Batys Qazaqstan oblysynda karantin shekteý sharalary kúsheitildi, dep habarlaidy "Ult aqparat".
BQO bas memlekettik sanitar dárigeri Muhamǵali Aryspaevtyń 30 naýryzdaǵy qaýlysy shyqty.
1 sáýirden bastap kúshine enetin qaýlyǵa sáikes tórtinshi toqsanda oblys aýdandarynda kontigenti 300 oqýshyǵa deiingi aýyldyq mektepterde balalar sanyn 25-ten asyrmai dástúrli túrde oqytýǵa ruqsat beriledi.
Al indet kóbeiip otyrǵan Oral qalasy, Bórli jáne Báiterek aýdandarynda bala sany 15-ten aspaýy tiis.
Bilim berý uiymy ákimshiliginiń sheshimi boiynsha sabaqtan tys ýaqytta 15 adamnan aspaityn toptarda shákirtterdi jeke oqytýǵa bolady.
Sondai-aq jalpy bilim beretin mektepterde mektepaldy jáne 1-5 synyptar, halyqaralyq mektepterde 1-7 synyptarda bala sanyn 25-ten asyrmai aralas formatta oqytýǵa ruqsat berildi.
Oral qalasy, Bórli jáne Báiterek aýdandarynda bala sany 15-ten aspaidy.
Oqý bitiretin synyptar (9-12 synyptar) aptanyń alty kúni ishinde bala sanyn 15-ten asyrmai, pánderdiń 70 paiyzyn shtattyq rejimde, 30 paiyzyn qashyqtan oqidy.
Tehnikalyq jáne kásiptik, orta bilimnen keiingi bilim berý uiymdarynda, joǵary jáne JOO-dan keiingi oqý oryndarynda 1 kýrs stýdentteri sanitarlyq talaptardy saqtai otyryp, aralas túrde bilim alady.
Dini oryndarda ár kelýshige keminde 5 sharshy metr esebinde, nysannyń tolýyn 30 paiyzdan asyrmai jumys isteýge ruqsat etilgenimen, buqaralyq ujymdyq is-sharalardy ótkizýge tyiym salyndy.
Qasietti Ramazan aiy kezinde de ujymdyq aýyzashar ótkizýge bolmaidy.
Qoǵamdyq tamaqtandyrý oryndary sanitarlyq talapty saqtai otyryp, saǵat 09.00-den 22.00-ge deiin jumys isteidi.
Ujymdyq, saltanatty, otbasylyq jáne basqa buqaralyq is-sharalar ótkizilmeidi.
Sonymen qatar taǵamdy jetkizý jáne shyǵaryp berýdi qospaǵanda, senbi jáne jeksenbi kúnderi qyzmetin toqtatady. Fýdkort qyzmeti de tek taǵamdy jetkizý jáne shyǵaryp berýmen ainalysa alady.
