Bes kún boiy memlekettik organdar men kúshtik vedomstvolardyń ókilderi «Beket-2022» oqý-jattyǵýynyń bekitilgen jospary boiynsha daǵdarystyq jaǵdailardy eńserýdiń jáne syrtqy qaýip-qaterlerge qarsy turýdyń túrli stsenariilerin pysyqtaidy, dep habarlady Qorǵanys ministrliginiń baspasóz qyzmeti.
Is-sharalar el Prezidenti Qasym-Jomart Toqaevtyń vedomstvoaralyq úilestirýdi qamtamasyz etý, kúshtik qurylymdardyń jedel jáne áskeri-tehnikalyq úilesimdiligin jolǵa qoiý jónindegi tapsyrmalaryn eskere otyryp iske asyrylatyn bolady.
Atalǵan oqý-jattyǵýǵa ortalyq memlekettik, jergilikti atqarýshy organdardyń ókilderi, Qorǵanys, Ishki ister, Tótenshe jaǵdailar ministrlikteriniń, UQK Shekara qyzmetiniń jáne Ulttyq ulannyń jedel toptary jumyldyryldy. «Beket-2022» oqý-jattyǵýy sheńberinde ár ásker tekteriniń, áskeri quramalar men memlekettik qurylymdardyń ózara is-qimyl jasaý elementteri pysyqtalýda.
Búgin poligonda daǵdarys qaýpi tóngende nemese oryn alǵan jaǵdaida qoǵamdyq qaýipsizdikti qamtamasyz etý boiynsha arnaiy-taktikalyq oqý-jattyǵý ótti. Politsiia bólimsheleri, Ulttyq ulan jáne memlekettik organdardyń ókilderi kúshter men quraldardy toptastyrýdy birlesip basqarý algoritmin jasady.
Jergilikti jerdegi taktikalyq oqý-jattyǵý sheńberinde Shekara qyzmeti áskeri qyzmetshileriniń aldyna shekaralas memlekettiń aýmaǵyna ótýge tyrysatyn qarýly qylmyskerlerdi izdeý jóninde tapsyrma berdi.
Sondai-aq, terrorizmge qarsy kúres jónindegi jedel shtab quqyq qorǵaý, arnaiy organdardyń, sondai-aq Qorǵanys ministrligi Arnaiy operatsiialar kúshteriniń qatysýymen terrorizmge qarsy oqý-jattyǵý ótkizdi. Qaýipsizdik qyzmetkerleri túrli qaýip-qaterlerge shuǵyl den qoiý, sondai-aq terroristik aktilerdiń saldaryn joiý jáne azaitý jónindegi is-qimyl máselelerin pysyqtady.
«Beket-2022» vedomstvoaralyq oqý-jattyǵýy ýákiletti organdar men áleýetti qurylymdardyń jumyldyrý daiyndyǵynyń jai-kúiin tekserýge, vedomstvoaralyq úilestirýdi kúsheitýge baǵyttalǵan.
