Tanymal ánshi Batyrhan Shúkenovtiń týǵan kúnine orai «Habar» arnasynda ánshiniń jankúierleri erekshe fleshmob ótkizdi. Ánshiniń shyǵarmashylyǵyn saǵynǵandar onyń repertýaryndaǵy tanymal týyndylardy onlain rejimde birge shyrqady, dep habarlaidy "Ult aqparat".
Batyrhan Shúkenov tiri bolsa búgin 58 jasqa tolar edi. Onyń ómirden ótkenine biyl bes jyl ótti. Áitse de ánshiniń kózi ketkenimen, onyń áni men shyǵarmashylyǵy máńgilik ólmeske ainaldy.
«Batyrdyń ánderin birge shyrqaiyq» atty aktsiiaǵa otandastarymyz ǵana emes, shetelden jankúierler de qatysty. Birinshi bolyp onlain rejimdegi aktsiiaǵa astanalyqtar qosyldy. «Qazaqstan» ortalyq kontsert zalynyń ǵimaratynda elimizge belgili óner qairatkerleri «Otan Ana» ánin oryndady.
Almatyda aktsiiaǵa óner qairatkerleri men jastar atsalysty. Respýblika saraiynyń aldynda aktrisa Bibigúl Súiinshalina, Dina Tasbolatova, sondai-aq Roman Kim «Djýliia» ániniń birinshi shýmaǵyn áýelete shyrqady. Bul ándi Bishkektegi jankúierler ilip áketip, aktsiia halyqaralyq sipatqa ie boldy.
Batyrhan Shúkenov Qyzylorda óńiriniń týmasy. Ánshiniń týǵan kúninde Qyzylordada jastar men mádeniet salasynyń ókilderi, Batyrhannyń týǵan-týystary bas qosty. Olardyń árbiriniń qolynda ánshiniń portreti boldy. Olar tikelei efirde «Qairan kóńil-ai» kompozitsiiasyn oryndady.
