Qazaqstanda kóshede ornatylǵan batýttardyń sany anyqtalyp jatyr. Bul týraly búgin QR IIM-de ótken baspasóz máslihatynda Tótenshe jaǵdailar komitetiniń tóraǵasy Vladimir Bekker málim etti, dep habarlaidy QazAqparat tilshisi.
«Biz batýttardyń esebi men baqylaýǵa alý jumysyn qatań túrde qolǵa aldyq. Onyń ústine, ótken aptada ministrdiń elimiz boiynsha balalarǵa arnalǵan oiyn alańdaryn tekserý jáne onyń ielerine qaýipsizdik erejelerin túsindirý týraly buiryǵy shyqty. Atalǵa buiryqtyń negizinde barlyq attraktsiondar men batýttardy sanap jatyrmyz. Keshegi kúnniń esebi boiynsha barlyǵy 339 balalar attraktsiony tekserildi, onyń ishinde 84-i - statsionarly, 254-i - úrlemeli batýt. Bul árine aqyrǵy tsifr emes, jumys jalǵasýda», - dedi V. Bekker.
Sondai-aq, komitet basshysy óńirlerdegi ornatylǵan batýttar sanyna jekelei toqtalyp ótti.
«Oblystar boiynsha aitar bolsaq, Qaraǵandy oblysynda - 63, Almaty oblysynda - 30, ShQO - 24, BQO - 23, Qyzylorda oblysynda - 21, Pavlodar oblysynda - 15, Nur-Sultan qalasynda -10 jáne Almaty qalasynda 17 batýt bar. Qalǵan óńirlerdegi batýttardyń sany 10-ǵa jetpeidi. Qaita eske salǵym keledi, Qazaqstandaǵy barlyq batýt sanalyp bitken joq. Onyń ústine, jaz maýsymy endi ǵana bastaldy, sondyqtan bul san ósedi dep oilaimyn. Osy aidyń sońynda batýttarǵa qatysty tolyq aqparatty jariia etetin bolamyz», - dedi ol.
Eske salaiyq, keshe QR IIM Tótenshe jaǵdailar komitetiniń tóraǵasy Vladimir Bekker batýttardyń qaýipsizdigin baqylaý máselesi qalai rettelip jatqanyn aityp berdi. Ol qaiǵyly oqiǵalarǵa ákep soqtyratyn birneshe sebepti atady.
