Sankt-Peterbýrg qalasynyń "Dinamo" hokkei klýbynyń oiynshysy Timýr Faizýtdinov qaitys boldy. Bul týraly aqparat atalǵan klýbtyń jelidegi resmi paraqshasynda jariialandy.
"Búgin "Dinamo Sankt-Peterbýrg" jastar hokkei klýbynyń qorǵaýshysy Timýr Faizýtdinov ómirden ótti. Klýb Timýrdyń týǵan-týystary men jaqyndaryna qaiǵyryp, kóńil aitady. Ol máńgi "Dinamoda" jáne bizdiń júregimizde saqtalady", – delingen habarlamada.
Resmi málimetke sáikes, 12 naýryzda Iaroslavl qalasynda jastar hokkei ligasynyń alǵashqy plei-off raýndy aiasynda jergilikti "Lokomotiv" pen piterlik "Dinamo" kezdesken. Osy oiynda Timýr Faizýtdinovtyń basyna shaiba tigen.
Jaraqat alǵan hokkeishi birden Iaroslavl qalasynyń aýrýhanasyna jetkizildi. Sportshynyń jaǵdaiy aýyr bolǵan. Úsh kúnnen keiin 19 jastaǵy Timýr Faizýtdinov alǵan jaraqatynan kóz jumdy.
Jastar hokkei ligasynyń aldaǵy oiyndary jas oiynshyny bir minýt únsizdikpen eske alýdan bastalady.
