Májilistiń jalpy otyrysynda depýtat Ǵaziz Qulahmetov Premer-Ministrdiń orynbasary Roman Skliarǵa turǵyn úi máselesine qatysty depýtattyq saýal joldady, dep habarlaidy "Ult aqparat".
«Qalyń buqarany turǵyn úimen qamtamasyz etý maqsatymen Úkimet birqatar memlekettik baǵdarlamalar jariialap, osy kúni iske asyryp jatqan jaiy bar. Syrt qaraǵanda ol baspanaǵa elimizdegi kóńili qalaǵan ár azamattyń qoly jetip jatqandai bop kórinýi ábden múmkin. Alaida ainalymdaǵy zań jobasyn jáne baǵdarlamalardyń oryndalý júiesin saraptai kele, basynda úii bar azamattardyń múddeleri eskerilmei qalǵany belgili boldy. Naqtylai keteiin, baspanasyn ýaǵynda azamattyq quqyqtyq kelisimshart negizinde, muragerlik jolmen, iaǵni, zańǵa qaishy kelmeitin ózge de joldarmen menshik iesi atanǵan azamattar. Bul sanattaǵy azamattar kóbine-kóp bir shańyraqtyń astynda turyp, ortaq sharýashylyq júrgizedi. Olar bir januianyń músheleri, bolmasa, jaqyn aǵaiyn-týystar. Alaqandai páterge 7-8 jan bop tyǵylyp, kún keship jatqan aǵaiyny bar osynda otyrǵan kóptegen depýtattardyń arasynda da kóp shyǵar… Turyp jatqan úileriniń jalpy aýdany, sharshy metrge shaqsaq, belgilengen tehnikalyq, sanitarlyq, ózge de normativtik talaptarǵa sai kelmeidi. Bizdegi qurylys normalaryna sai, tórtinshi dárejeli turǵyn úi ǵimarattarynda adam basyna 15 sharshy metr, birinshi dárejeli ǵimarattarda maksimaldy norma 25 sharshy metr. Al, BUU-nyń halyqaralyq standarttarynda minimaldy kórsetkish 30 sharshy metrge teń eken», - dedi depýtat.
Osy oraida ol bul jaǵdai otbasylarda qandai problemalarǵa alyp keletinin atap ótti.
«Úi-jaiy joq ár otbasy óz baspanasyna qol jetkizýdi armandaidy. Tar úidiń turǵyndary baspananyń keńdigin ańsaidy. Ókinishke qarai, ol múmkindik qazir kóp adam da áli de joq. Qarjy tapshylyǵy qolbailaý. Sebebi, aǵa býynnyń jiǵan qory ózinen aspaidy, jastar bolsa, dúnie terýdi áli de bastamaǵan. Jabylyp nesie alaiyn dese, bank zeinetkerlerge aqsha bermeidi. Jastardyń alar ailyǵy mardymsyz bolǵan soń, bank olarǵa da qaiyrymmen qaramasy anyq. Bastapqy jarnasyn jiǵan kúnniń ózinde, ai saiynǵy tólemderine shamalary joq. Qysqasy, «tuiyq kósheniń» turǵyndaryndai bop júr. Jer alyp, úi salaiyn dese, ol múmkindikten de aiyrylyp otyr. Sebebi, jer alý úshin dúnie-múlkiń bolmaýy tiis. Turǵyn úi baǵdarlamalaryna jaýapty kompaniialar bolsa, QR «Turǵyn-úi qatynastary» týraly Zańnyń 69 babynyń 1 tarmaqshasyna siltep, biz aityp otyrǵan otbasy múshelerine baspana alýyna ruqsat bermeidi. Áleýmettik ahýaldyń jaisyzdyǵy, baspana alý múmkindiginiń joqtyǵy, óz buryshyńnyń bolmaýy, otbasy ishindegi tatýlyqty buzyp, ajyrasyp jatqandar sanyn arttyryp jatqany da jasyryn emes», - dedi Ǵaziz Qulahmetov.
Sondyqtan QHP-nyń kelesi usynystary bar:
1. Ainalymdaǵy zańnamaǵa turyp jatqan úidiń aýdanyn, iaǵni sharshy metrlerin ulǵaitý arqyly baspana jaǵdaiyn jaqsartý degen uǵymdy kirgizý qajet jáne kedergi keltirip otyrǵan normalardy tolyqtai alyp tastaý kerek. Sonda bir-eki bólmede tarlyqta turyp jatqan otbasy qalaýynsha, úsh-tórt bólmeli keń páterge kóshý múmkindigin alar edi. Bosaǵan úi baspana qoryna ótip, kelesi menshik iesine beriler edi.
2. Baspanany baǵalaý, satyp alý, menshik iesinen kelesi úmitkerge baspana berý tártibi men erejelerin pysyqtaý qajet. Osylaisha, turǵyn-úi qoryn qalyptastyrýdyń utymdy ári qosymsha joly paida bolar edi.
