Bir qaladan ekinshi qalaǵa qonys aýdarýshylardyń kólik salyǵy boiynsha týyndaityn máselege memlekettik nómirdiń qatysy joq. Memlekettik kirister komitetiniń óndiristik emes tólemderdi ákimshilendirý basqarmasy basshysynyń orynbasary Oljas Otar osyndai málimet berdi, dep habarlaidy QazAqparat.
Ortalyq kommýnkatsiialar qyzmetinde ótken brifingide BAQ ókilderi tarapynan mekenjaiyn aýystyrǵan kólik ielerine qatysty saýal qoiyldy.
«Salyq tóleýshi bir qaladan ekinshi qalaǵa aýysqan jaǵdaida turǵylyqty mekenjaiy ózgerse, ol kisilerdiń esebi sol salyq tóleýshi tirkeýge turǵan kezde avtomatty túrde aýysady. Biraq keibir jaǵdailar kezdesip jatady. Paraqsha esebi qazirgi turyp jatqan mekenjaiǵa aýysqan jaǵdaidyń ózinde de ol kisiler burynǵy jerge salyq tóleýi kezdesedi. Ondai kezde salyq qyzmetkerleri túzetý engizip, salyqty jańa mekenjai boiynsha jiberedi. Bul kóbinese eski mekenjaiy boiynsha salyq tóleitin adamdarǵa bailanysty týyndaityn másele», - deidi Oljas Otar.
Vedomstvo ókili mekenjai aýysqan kezde týyndaityn salyq máseleleriniń memlekettik nómirdi aýystyrýǵa qatysy joq ekenin de eskertti.
«Salyqty jańa kóship kelgen qalada tóleý úshin kóliktiń memlekettik nómirin aýystyrý mindetti emes. Bul kisilerdiń kólikteriniń salyǵy turǵylyqty mekenjaiy boiynsha esepteledi. Iaǵni memlekettik nómirdi aýystyrýdyń qajettigi týyndamaidy», - komitet ókili.
