Qazaqstannyń bas sanitarlyq dárigeri Aijan Esmaǵambetova jumys berýshilerdi jumysqa úzilisten shyqqan qyzmetkerlerinen PTR testiniń nátijesin talap etpeýge shaqyrdy.
“Ókinishke qarai, búginde memlekettik bolsyn, jekemenshik bolsyn, jumys berýshilerdiń kóbi is-sapardan, eńbek demalysynan, aýyrýǵa bailanysty úzilisten shyqqan qyzmetkerleriniń bárinen mindetti túrde PTR taldaýyn jasatýdy talap etip jatyr. Qurmetti jumys berýshiler, bul talap infektsiianyń ujymyńyzǵa kirýinen qorǵamaidy” dedi Esmaǵambetova ortalyq kommýnikatsiialar qyzmetindegi brifingte.
Dárigerdiń aitýynsha, eger jumys orny ashyq bolyp, qyzmetkerleri kirip-shyǵa alsa, tapsyrylǵan PTR testinen paida joq.
“Tańerteń jumysqa kelerde jáne jumys ornynan úige qaitarda biz adamdarmen bailanysqa túsemiz – qoǵamdyq kólikke minemiz, dúkenge baramyz, jaqyndarymyzben jáne dostarymyzben kezdesemiz, belgili bir qyzmetter alamyz. Mundaida virýs juqtyrý qaýpi árdaiym bolady” dedi ol.
Esmaǵambetovanyń sózinshe, jumys berýshilerdiń bul talaby PTR taldaýyn júrgizetin zerthanalarǵa artyq salmaq túsirip otyr.
“PTR taldaýyn ony rasymen qajet etetinder ǵana jasatýy tiis. Al jumys berýshiler qyzmetkerlerin profilaktikanyń ózge túrlerimen qamtamasyz ete alady. Mysaly, jumysqa kireberiske kontaktisiz termometriia qoiý, sanitaizerlermen qamtamasyz etý, maskany taǵy, áleýmettik qashyqtyqty ustaný” dedi Esmaǵambetova.
19 maýsym kúni densaýlyq saqtaý vitse-ministri Lázzat Aqtaeva elde PTR taldaýyn 56 zerthana júrgizip jatyr degen bolatyn. Vitse-ministr kúnine 28 myńǵa jýyq PTR taldaýy jasalatynyn, bul kórsetkishti 35 myńǵa jetkizý josparlanyp otyrǵanyn aitqan. Taldaýdyń basym kópshiligin Ulttyq ekspertiza ortalyǵy, “Olimp”, “MPK” mobildi ortalyǵy, Invitro, Reprodýktivti meditsina oblystyq ortalyǵy jáne Invivo zerthanalary júrgizip otyr.
Ótken aptanyń sońynda “Olimp” Almaty men Nur-Cultan boiynsha, Invitro respýblika boiynsha úsh kúnge PTR taldaýyn jasaýdy toqtatatynyn málimdegen. Turǵyndar PTR taldaýyn jasatýda qiyndyqqa tap bolyp jatqanyn aityp, shaǵymdanyp jatyr.
Densaýlyq saqtaý ministrligine qarasty Qoǵamdyq densaýlyq saqtaý ulttyq ortalyǵynyń dereginshe, koronavirýs pandemiiasy bastalǵaly Qazaqstanda 1,37 million PTR taldaýy jasalǵan.
PTR taldaýynyń kúndik kórsetkishi 19-20 maýsym kúnderi 30 myńnan asyp, 22-23 maýsym kúnderi 24 myńǵa jetpei qaldy.
Qazaqstanda koronavirýs 28 856 adamnan anyqtalǵan. Resmi statistikaǵa onyń 18 231-i ǵana kirgen.
Qazaqstan biligi 3 maýsymnan beri koronavirýs juqtyrǵandardy aýrý belgisiniń bar-joǵyna qarai eki bólek eseptep keledi. Aýrý belgileri baryn “aýyrǵandar”, joǵyn “tasymaldaýshy” dep atady. Bilik sońǵysyn virýs juqtyrǵandardyń negizgi statistikasyna kirgizbei otyr. Al koronavirýstyń taralýyn baqylap otyrǵan álemdik densaýlyq saqtaý uiymdary men ortalyqtary biliktiń resmi deregine súienip, Qazaqstanda COVID-19 juqtyrǵandardyń sanyn kórseterde aýrý belgisi joq jaǵdailardy eskermei otyr.
Barlyǵy 11 158 adam jazylyp shyǵyp, 127 adam qaitys boldy.
