Berik Asylovtyń aitýynsha, jyl basynan beri prokýratýra qabyldaǵan sharalardyń nátijesinde 7 myńnan asa zańbuzýshylyq joiylǵan. Onyń kóbi memlekettik satyp alýlar, densaýlyq saqtaý, ekologiia jáne balalardyń quqyqtaryn qorǵaý salalarynda anyqtalǵan. 10 myńnan asa memlekettik qyzmetshi men kvazimemlekettik sektordyń qyzmetkeri ákimshilik jáne tártiptik jaýapqa tartylǵan. Prokýratýranyń aralasýynan keiin memleketke 8,4 milliard teńge qaitarylǵan, 177 myńnan asa eńbek quqyǵy qalpyna keltirilgen, sondai-aq, 1 milliard teńgeden asa jalaqy qaryzy ótelgen.
Prezidentke kriminogen jaǵdailar men azamattardyń konstitýtsiialyq quqyqtaryn qamtamasyz etý úshin qylmystyq-quqyqtyq salada qabyldanyp jatqan sharalar jóninde aqparat berildi. Prokýrorlar zańsyz ustalǵan 596 azamatty bosatqan. 542 azamatqa qatysty sheshimdi qaita qaraý usynylǵan, sonyń ishinde sottalǵan 90 adamnyń jaǵdaiy jaqsartylyp, 9 adam aqtalǵan.
Qasym-Jomart Toqaevqa qylmystyq protsestiń jańa úsh býyndy modeliniń engizilý barysy jóninde arnaiy baiandaldy. Biyl prokýrorlar 152 myń protsessýaldyq sheshimdi qaita elekten ótkizgen. Sonyń ishinde 11,5 myńnan asa qaýly zańsyz dep tanylǵan. 1 myńǵa jýyq azamattyń qylmystyq protseske negizsiz tartylýyna jol berilmegen.
Berik Asylov Memleket basshysyna biznesti qorǵaý, ásirese zańsyz qylmystyq qýdalaýǵa jol bermeý úshin qabyldanyp jatqan sharalar jóninde jan-jaqty baiandady. Prezidenttiń tapsyrmasy boiynsha prokýrorlar kásipkerlerge qatysty qozǵalǵan barlyq qylmystyq istiń zańdylyǵyn tekserip jatyr. Júrgizilgen tekserister nátijesinde óndiristegi 378 istiń 36-sy toqtatyldy. Bizneske kedergi jasaý, quqyq qorǵaý jáne basqa da memlekettik organ ókilderi tarapynan qyzmetin asyra paidalaný derekteri boiynsha 12 sotaldy tergeý amaldary júrgizilip jatyr. Materialdardy tekserý áli de jalǵasyp jatyr.
Kásipkerlerdiń qylmystyq protseske negizsiz tartylýyn boldyrmaý maqsatynda uiymdastyrýshylyq jáne zańnamalyq sharalar kesheni ázirlenip jatyr.
Memleket basshysyna qańtar oqiǵasyna bailanysty tergeý amaldarynyń barysy týraly arnaiy baiandaldy. Búginde 489 azamatqa qatysty is sotqa joldanǵan. 331 adam urlyq, tonaýshylyq, qarý saqtaý jáne urlaý derekteri boiynsha sottalǵan. Tek 23 adamǵa qatysty bas bostandyǵynan aiyrý týraly naqty sheshim shyqqan, qalǵandaryna jeńil jaza taǵaiyndalǵan. Ruqsat etilmegen tergeý amaldary men jappai tártipsizdik kezinde qaza bolǵandarǵa qatysty ister erekshe baqylaýǵa alynǵan.
Qasym-Jomart Toqaev qańtar oqiǵasynyń sebebin jan-jaqty tekserip, oǵan kinálilerdi obektivti túrde anyqtaý, sondai-aq, tergeý qorytyndysy jóninde jurtshylyqqa turaqty aqparat berý qajet ekenin atap ótti. Budan bólek, Prezident elimizdiń áleýmettik jáne ekonomikalyq ómiriniń barlyq salasynda zańdylyqty qamtamasyz etýdiń asa mańyzdy ekenin aitty.
