Foto: ashyq derekkózden alyndy
Bas prokýror Berik Asylov qańtar oqiǵasy kezindegi 20 myń lańkes týraly suraqqa jaýap berdi, - dep habarlaidy Tengrinews.kz agenttigi.
"Túrli aqparat tústi, sonyń ishinde bul da bar. Ártúrli aqparat, sonyń ishinde azamattardan sheteldik qylmyskerler bar ekendigi, onyń ishinde shet tilderde - qyrǵyz, ózbek, ártúrli tilderde sóileitini aityldy", - dedi Asylov Májilis kýlýarynda jýrnalisterdiń suraqtaryna jaýap berip.
Ol qoǵamda shabýyl jasaǵandardyń bári lańkes degen oi qalyptasqanyn atap ótti.
"Terroristik áreket jasaǵan adamdardyń barlyǵy lańkes bolyp sanalady. Onyń saqal qoiyp nemese avtomatpen júgirýi mindetti emes. Tipti kóptegen quqyq qorǵaý organdary tergeý júrgizgen kezde maǵan osy suraqty qoidy: bul lańkesterdiń bári qaida? Qoǵamda da osyndai suraq bar.
Terrorister ózderin terrorist dep resmi túrde málimdegen joq. Qiratyp, órtegen, ákimdikti basyp alǵan, barlyq áreketi úshin olardy terroristik akt jasady dep esepteimiz jáne, árine, biz olardy terrorist dep sanaimyz", - dep qosty Bas prokýror.
