- QR Bas prokýratýrasy Jambyl oblystyq ishki ister departamentiniń naqty qylmystyq ister boiynsha sheshimderin tekserýge vedomstvoaralyq top jiberedi. Bul týraly qadaǵalaýshy organnyń baspasóz qyzmetinen málim etti, dep habarlaidy Ult.kz tilshisi QazAqparat agenttigine silteme jasap.
«Jambyl oblysynyń turǵyndary tarabynan oblystyq Ishki ister departamenti qyzmetkerleriniń is-áreketine shaǵymdardyń jiilep ketýine bailanysty Bas prokýrordyń tapsyrmasymen atalǵan óńirge baryp, naqty qylmystyq ister boiynsha qabyldanǵan sheshimderdi tekseretin vedomstvoaralyq top qurylady. Topty Bas prokýrordyń orynbasary E.Kenenbaev basqarady», - delingen habarlamada.
Sonymen qatar Bas prokýratýranyń baspasóz qyzmeti tolyq aqparat sot talqylaýy men vedomstvoaralyq toptyń jumys nátijesi boiynsha usynylatyndyǵyn atap ótken.
Aita keteiik, búgin QR Bas prokýrory Jaqyp Asanov qadaǵalaýshy organ ǵimaraty aldynda ózin órtep jibergennen keiin qaitys bolǵan Maira Rysmanovanyń ápkesin qabyldaǵan bolatyn.
Esterińizge sala ketsek, aǵymdaǵy jyldyń 6 jeltoqsany kúni kúndizgi saǵat 12-16-da QR Bas prokýratýrasynyń baqylaý-ótkizý pýnktinde 1968 jyly dúniege kelgen Maira Rysmanova ózin-ózi órtep, qalalyq aýrýhanaǵa jetkizilgen. Onyń mundai qadamǵa barýyna uly E.Ahmetovtiń iri kólemde esirtki saqtady degen aiyppen 4,5 jylǵa sottalýy sebep bolǵan. Búgin Maira Rysmanova elorda aýrýhanalarynyń birinde qaitys boldy.
