Foto: ashyq derekkózden
QR Bas prokýrorynyń orynbasary Jandos Ómiráliev Vladislav Chelahtyń Prezidentke jazǵan haty týraly tilshiler suraǵyna jaýap berdi, dep habarlaidy QazAqparat agenttigi.
Buǵan deiin áleýmettik jelide Vladislav Chelahtyń Memleket basshysyna hat jazǵany, Arqankergende shyn máninde ne bolǵanyn aitýǵa daiyn ekeni habarlanǵan edi.
«Ókinishke qarai, qazir mende Vladislav Chelahtyń bizge júgingeni týraly aqparat joq. Sondyqtan dál qazir pikir aita almaimyn. Biraq osylai júgingen bolsa, ony pysyqtap, tiisti jaýap beremiz», - dedi Ómiráliev Májilis kýlýarynda tilshi suraǵyna.
Eske sala ketsek, 2012 jyly mamyrdyń 27-sinen 28-ine qaraǵan túni Almaty oblysynyń «Arqankergen» shekara beketinde 14 shekarashy jáne bir qoryqshy qaza tapty.
Aman qalǵan on besinshi sarbaz Vladislav Chelah shekara beketinen 20 shaqyrym jerde ornalasqan qystaýdan tabyldy.
Tergeý jumysy barysynda Chelah basty kúdikti retinde qarastyrylyp, qamaýǵa alyndy.
Oǵan tergeýshi toǵyz bap boiynsha aiyp taqty, sonyń ishinde «Eki nemese odan da kóp adamdy óltirý», «Jeke zattardy urlaý», «Qupiia qujattardy urlaý», «Qarýdy urlaý», «Qarýdy zańsyz ustaý», «Áskeri múlikti búldirý», «Áskeri qyzmetten qashý», jáne «Bóten bireýdiń baspanasyna zańsyz kirý» baptary bar.
Sońynda Chelah qyzmettesterin óltirgenin moiyndap, ómir boiyna bas bostandyǵynan airyldy jáne Qostanai oblysyndaǵy «Qara búrkit» túrmesine jiberildi.
2019 jyly Vladislav Chelah bas bostandyǵynan aiyrý jazasyn alyp tastaýdy, quqyǵy buzylǵany úshin 30 mln teńge moraldyq shyǵyn óteýdi jáne isti qaita qaraýdy suraǵan edi.
QR Joǵarǵy soty bul shaǵymdy qanaǵattandyrmady.
