Qazaqstan Musylmandary dini basqarmasynyń tóraǵasy, Bas múfti Naýryzbai qajy Taǵanuly Sátbaev qalasyndaǵy oqiǵaǵa qatysty pikir bildirdi, dep habarlaidy "Ult aqparat".
«Keshe ǵana qabyrǵamyzdy qaiystyratyn, janymyzǵa batatyn jaǵdailar jóninde estip qaldyq. Osy tusta, qurmetti halaiyq, biz barynsha sabyrlyq tanytaiyq. Biz – quqyqtyq memleketpiz. Qylmyskerler mindetti túrde jazasyn zań aiasynda alatyn bolady. Tek bul kezde tártip saqtamai, baiqamai kishkentai jaǵdaidy úlkenge ainaldyryp almaiyq, qurmetti aǵaiyn. Osy tusta quqyq qorǵaý organdaryna osy máseleni ashyq qarap, halyqqa shynaiy aqparat berse degen úmittemiz. Alla barshamyzdyń tilegimizdi qabyl etsin», - dedi Bas múfti Ortalyq kommýnikatsiialar qyzmetinde.
Eske sala ketsek, búgin Ishki ister ministri Erlan Turǵymbaev Sátbaevtaǵy bes jasar qyz balanyń joǵalýyna qatysty oqiǵanyń mán-jaiyn aityp bergen bolatyn.
«23 shilde kúni keshki saǵat 9-da Sátbaev qalasynyń ishki ister basqarmasyna 5 jasar qyzdyń joǵalǵany týraly aryz tústi. Dereý izdestirý nátijesinde búldirshin qaladaǵy bir úiden tabyldy. Jas qyzdy zorlady degen kúdikpen bir azamat qamaýǵa alyndy. Biraq birneshe adam kúdiktini óz qolyna berýdi talap etti, janjal shyǵardy», - dedi Erlan Turǵymbaev OKQ-da ótken baspasóz máslihatynda.
Sondai-aq, búgin Prezident Shornaq aýyly men Sátbaev qalasyndaǵy jaǵdaiǵa bailanysty keńes ótkizdi.
