Qazaqstan musylmandar dini basqarmasynyń tóraǵasy, Bas múfti Naýryzbai qajy Taǵanuly sý tasqyny bolǵan Maqtaaral aýdanyna kelip, turǵyndarmen kezdesti. Topan sýdan zardap shekken aýyl turǵyndarynyń qazirgi jaǵdaiymen tanysty, habarlaidy "Ult aqparat".
«Nur Otan» partiiasy oblystyq filialy tóraǵasynyń birinshi orynbasary Beisen Tájibaev Bas múftige sý alǵan aýyldar men evakýatsiialyq beketterde júrgizilip jatqan jumystarymen tanystyrdy. Naýryzbai qajy Taǵanuly Maqtaaral aýyldyq okrýgi men Atakent kentindegi evakýatsiialyq beketterde bolyp, sonda ýaqytsha ornalastyrylǵan turǵyndarǵa aýyzasharǵa arnap «Ramazan táttisin» usyndy. Alyp kelgen 30 tonna undy ortalyq qoimaǵa tabystap, oblystyq qaiyrymdylyq qoryna kómek retinde aýdarylatyn 10 mln teńgeniń sertifikatyn tabystady.
«Apat aityp kelmeidi. Jaratýshy bizge osyndai synaq bergen eken. Endeshe sabyr saqtai otyryp, synan súrinbei ótýdi jazsyn dep tileiik. Ózderińiz biletindei, elimizdiń túkpir-túkpirinen kóptegen kómek arqyly barsha halyq qoldaý tanytyp jatyr. Kómek qolyn sozyp maqtaaraldyqtarmen birge ekenin bildirip jatqan barlyq azamattarǵa Alla razy bolsyn. «Árbir istiń qaiyry bolady» demekshi Alla qalasa Úkimet tarapynan salynyp jatqan sý jańa úilerge qonystanatyn bolasyzdar. Budan keiin qýanyshty kúnder kóp bolsyn», - dedi Bas múfti.
Sapar sońynda Naýryzbai qajy Jetisai aýdanynda bolyp, «Baspanaǵa jol» qaiyrymdylyq qory esebinen salynǵan 3 birdei úidiń kiltin áleýmettik az qamtylǵan otbasylarǵa saltanatty túrde tabys etti.
