2018 jyldyń 21 tamyzy - Qurban aittyń birinshi kúni. Osy merekege orai Qazaqstan musylmandary dini basqarmasynyń tóraǵasy, Bas múfti Serikbai qajy Oraz musylman qaýymyn Qurban ait meiramymen quttyqtady.
«Meiirimniń merekesi - Qurban ait qutty bolǵai!
Asa Qamqor, erekshe Meiirimdi Allanyń atymen bastaimyn!
Qadirmendi qaýym!
Barshańyzdy isi musylman qaýymynyń ulyq meiramy - qurban aitpen shyn júrekten quttyqtaimyn. Ait meiramy qutty-berekeli bolǵai! Ár otbasyna amandyq, myqty saýlyq, mol yrys pen baq-bereke tileimin!
Qurban ait - kúlli musylman úmbetiniń eki ulyq merekesiniń biri. Bizdiń halqymyz bul meiramdy san ǵasyrdan beri erekshe qadirlep, airyqsha atap ótken. Aitýly meiramda aǵaiyn-jurt bir-birine «qurban ait qutty bolsyn, ait qabyl bolsyn» aityp, jyly lebizderi men izgi tilekterin arnaǵan.
Kórshi men týysqanǵa aittap barý, qadirli qonaqqa aittyq berip, úlkenniń alǵysy men batasyn alý - sonaý zamannan jalǵasyp kele jatqan musylmandyq dástúrimiz.
Allaǵa shúkir, saltynan jańylmaǵan jurtymyz táýelsizdik jyldarynda aitty toilaý dástúrin qaita jańǵyrtyp, ony halyqtyq deńgeide atap ótýge múmkindik aldy. Elbasynyń igi bastamasymen elimizde qurban aittyń qurmetine demalys jariialanyp, bul meiram barsha ult pen ulysty birlik pen izgilikke úndeitin halyqtyq merekege ainaldy.
Ásilinde «Qurban» sózi «jaqyn bolý», «jaqyndaý» degen uǵymdardy bildiredi. Musylman balasy ait kúni qurbandyq shalý arqyly Allaǵa degen aq nietin pash etedi. Óitkeni, qasietti Quranda Haq Taǵala: «Umytpańdar, olardyń eti de, qany da eshqashan Allaǵa jetpeidi. Oǵan jetetin nárse - júrekterińizge uialaǵan taqýalyqtaryń (shynaiy nietteriń)» («Haj» súresi, 37-aiat), - dep adal niettiń mańyzdylyǵyn atap ótken.
Jaǵdaiy bar, əri jolaýshy emes musylmanǵa qurbandyq shalý - ýəjip, musylmandyq mindet. Al múmkindigi joq adamǵa Alla Taǵala mundai mindet júktemegen. Bul qasietti kúnde múmkindigi joq, turmysy tómen otbasylarǵa qol ushyn berip, olarǵa qýanysh syilaý - saýapty is.
Qurbandyqqa túie, siyr jəne qoi, eshki shalynady. Bir qoshqar nemese qoi bir kisi atynan shalynady. Al qara mal nemese túieni jeti kisi birigip, qurbandyqqa shalýǵa bolady. Qurbandyq malyn ait namazynan keiin aittyń úshinshi kúni kesh batqanǵa deiin shalýǵa bolady. Qurbandyq eti aǵaiyn-týysqa, kórshige, turmysy tómen otbasylaryna taratylady.
Ait kúni erte turyp, ǵusyl quiynyp, ait namazyna qatysý - musylmandyq mindet. Ait namazyna ádemi, taza kiimmen barǵan abzal.
Qurmetti otandastar!
Qurban ait - keshirim men meiirimniń, qanaǵat pen qaiyrymdylyqtyń merekesi. Aittyń qurmetine izgilik pen keńshiliktiń jolyn ustanyp, qaraýsyz qalǵan qarttarǵa qaiyrymdylyq jasap, qamkóńil jandarǵa syilyq berýdiń saýaby mol. Osy rette barsha otandastarymdy el igiligi úshin jasalatyn qaiyrymdylyq aktsiialary men saýapty is-sharalarǵa atsalysýǵa shaqyramyn.
lla Taǵala shalǵan qurbandyqtaryńyz ben igi amaldaryńyzdy qabyl etkei. Qasietti Mekke qalasynda halqymyzdyń birligi men berekesin surap, duǵa jasap jatqan otandastarymyzdyń tilegi men qajylyǵy qabyl bolǵai! Ámin!», - delingen quttyqtaýda.
