Bizdiń mindetimiz – tótenshe jaǵdaida tózimdilik tanytyp, otbasymyzdy indetten aman saqtaý. Bul týraly Bas múfti Naýryzbai qajy Taǵanuly málim etti, dep habarlaidy "Ult aqparat".
«Barshańyzdy kúlli musylman qaýymy asyǵa kútken qasietti Ramazan aiynyń kelýimen shyn júrekten quttyqtaimyn! Ár shańyraqqa baqyt pen bereke tileimin! Jaratqan Iem jar bolsyn! Ramazan – tárbie men taǵylym aiy. Qasietti aida musylman balasy qanaǵat, shúkir, meiirim, baýyrmaldyq, keshirim syndy kórkem minezdi qalyptastyrýǵa tyrysady. Saýaby eselenip jazylatyn aida árbir izgi amalymyz qabyl bolǵai. Alla Taǵala ustaǵan orazamyzdy, qoǵam úshin jasalǵan qaiyrly isterimizdi mol saýaptan jazǵai», - dedi Bas múfti óz quttyqtaýynda.
«Ókinishke qarai, elimizde jariialanǵan tótenshe jaǵdaiǵa bailanysty juqpaly indettiń aldyn alý úshin meshitterimizde jamaǵatpen oqylatyn namazdy ýaqytsha toqtatýǵa májbúr boldyq. Adam densaýlyǵy basty qundylyq bolǵandyqtan, álem elderiniń múftileri de ýaqytsha osyndai sheshim qabyldady. Biz talai zulmatty zamandy bastan keshken, syndarly sátte úmitsizdikke berilmei, bir Alladan medet tilegen halyqpyz. Imanymyz ben birligimizdiń arqasynda qiyndyqty eńserip, ósip-óngen elmiz. Allanyń járdemimen bul ýaqytsha synaqty da eńseremiz», - dedi Naýryzbai qajy Taǵanuly.
Sonymen qatar ol Elbasy Nursultan Nazarbaev «Birlese bilgen el bárin jeńedi» atty Úndeýinde: «Biz osyndai syn saǵatta septigin tigizetin halqymyzdyń tózimdiligi, erik-jigeri jáne ózine degen zor seniminiń arqasynda mindetti túrde jeńip shyǵamyz. Qiyndyqqa qaiyspai, belimizdi bekem býyp, bereke-birligimizden airylmaiyq», dep halqymyzdyń jigerin oiatqanyn atap ótti.
«Memleket basshysy Qasym-Jomart Toqaevtyń Jarlyǵymen qurylǵan komissiia halyqtyń densaýlyǵyn saqtaý men qaýipsizdik sharalaryn qamtamasyz etý baǵytynda mańyzdy sheshimder qabyldaýda. Saiyp kelgende, túrli salaǵa jaýapty tulǵalar óz deńgeiinde jaýapty mindetterdi atqarýda. Al siz ben bizdiń mindetimiz – tótenshe jaǵdaida tózimdilik tanytyp, tazalyq sharalaryna asa mán berip, ózimizdi, otbasymyzdy indetten aman saqtaý. Juqpaly indetpen oqshaýlanyp kúresýimiz kerek», - dedi Bas múfti.
