Qazaqstan musylmandary dini basqarmasynyń tóraǵasy Serikbai qajy Oraz Astanadaǵy «Áziret Sultan» meshitinde Amerika Qurama Shtattarynyń Qazaqstandaǵy elshisi Djordj Kroldy óz ótinishi boiynsha qabyldady, dep habarlaidy "Ult aqparat".
Resmi kezdesýde Bas múfti múftiiattyń jumysy týraly áńgimelep berdi. Sonymen qatar, QMDB-nyń bastamasymen osy jyldyń 2 naýryzynda ótken Eýraziia musylman ǵulamalarynyń forýmy jaily sóz boldy. QMDB tóraǵasy halyqaralyq forýmnyń joǵary deńgeide ótkenine toqtaldy.
Basqosýda Astanada ár 3 jyl saiyn ótetin Álemdik jáne dástúrli dinder kóshbasshylary seziniń maqsaty men dúniejúzi din kósemderin ortaq maqsatqa úndeýdegi róli tilge tiek etildi.
«Beibitshilik pen birlikti basty maqsat etken bizdiń elimiz álemdik qaýymdastyq aldynda jer betinde tynyshtyq pen yntymaqty ornatýǵa umtylǵan memleket retinde tanyldy. Óitkeni, bizdiń dinimiz adamzat balasyn beibitshilikke úndeidi. Halqymyzda «Birlik bar jerde tirlik bar» degen naqyl sóz bar. Birlik ornaǵan qoǵamda din, ǵylym órkendeidi», – dedi Serikbai qajy Oraz.
Óz kezeginde diplomat ýaqyt bólip, resmi qabyldaýǵa múmkindik jasaǵan Bas múftige alǵysyn jetkizip, suraqtaryn qoiyp, emen-jarqyn suhbattasty.
Bas mýfti mártebeli meimanǵa qazaq, orys, aǵylshyn tilinde jaryq kórgen «Uly dala tósindegi Islam» atty kitabyn syiǵa tartty.
