Qazaqstanda turyp jatqan barlyq ult ókilderiniń quqyǵy teńdei. Bul jaiynda Qazaqstan halqy Assambleiasy taǵy bir márte eske saldy, dep habarlaidy QazAqparat.
QR Konstitýtsiiasy kúnine arnalǵan «Táýelsizdiktiń 30 jyldyǵy – birliktiń, beibitshilik pen kelisimniń 30 jyldyǵy» taqyrybynda ótken dóńgelek ústel barysynda Qazaqstan halqy Assambleiasynyń músheleri memlekettik tildi bilýge qatysty óte kinámshil suraqty qozǵady. Olar bul másele kópultty respýblika turǵyndary arasyndaǵy alaýyzdyq týdyrmaýy tiis degen ortaq paiymǵa keldi.
«Orys halqynyń ókili retinde eki halyqtyń, qazaq pen orystyń taǵdyry tarihi turǵyda baiaǵydan-aq órilgendigin aita alamyn. Ondaǵan jyldar boiy bizdiń taǵdyrymyz, ómirimiz, mádenietimiz bir-birimen birigip ketti. Sondyqtan Qazaqstanda orystar nashar turady nemese olar qysym kórip jatyr deý – bul dáleldenbegen, daýryqpa sóz», - dedi Natalia Dementeva.
Aita keteiik, is-sharaǵa Májilis depýtattary, Qazaqstan halqy Assambleiasy saraptamalyq keńesiniń músheleri, ziialy qaýym men etnomádeni birlestikterdiń ókilderi qatysty. Olar azamattardyń quqyqtary men bostandyqtary, Ata zańnyń normalarymen bekitilgen teńdik, birlik, zań ústemdigi qaǵidattary týraly máselelerdi qozǵady. Qazaqstannyń Táýelsizdik jyldaryndaǵy eldegi etnosaralyq, qoǵamdyq kelisim men jalpyulttyq birlikti qamtamasyz etýsalasyndaǵy mańyzdy jetistikteri talqylandy.
