Bangkokte bar órtenip, 27 adam qaza tapty, dep habarlaidy ult.kz.
Tailand astanasy Bangkokte ornalasqan oiyn-saýyq oryndarynyń birinde joiqyn órt shyǵyp, keminde 27 adam qaza tapty. Qaiǵyly oqiǵa 13 shildege qaraǵan túni Chatýchak aýdanyndaǵy tanymal barda bolǵan.
Bilik ókilderiniń málimetinshe, qaza tapqandardyń basym bóligi jalynnan emes, ǵimarat ishin lezde basqan qoiý tútinge ýlanyp kóz jumǵan. Kóptegen adam ǵimarattyń artqy bóligindegi dárethana mańynda qalyp qoiǵany habarlandy.
Sońǵy málimet boiynsha, taǵy 63 adam túrli deńgeide jaraqat alǵan. Olardyń 22-siniń jaǵdaiy aýyr, zardap shekkender jaqyn mańdaǵy aýrýhanalarǵa jetkizilgen.
Aldyn ala aqparatqa sáikes, órt sahna mańyndaǵy elektr qalqanynan shyqqan tútinnen bastalǵan. Kóp uzamai elektr jaryǵy sónip, jarylys bolyp, jalyn búkil ǵimaratqa óte jyldam taralǵan. Órt sóndirýshiler tilsiz jaýdy shamamen jarty saǵat ishinde tolyq aýyzdyqtady.
Oqiǵa ornyna Tailand premer-ministri Anýtin Charnvirakýl men Bangkok gýbernatory baryp, qaza tapqandardyń týystaryna kóńil aityp, zardap shekkenderge jan-jaqty kómek kórsetiletinin málimdedi. Qazir órttiń naqty shyǵý sebebi men qaýipsizdik talaptarynyń saqtalýy boiynsha tergeý júrgizilip jatyr.
Áleýmettik jelilerde oqiǵa ornynan túsirilgen beinejazbalar keńinen tarady. Kadrlardan bardan qoiý qara tútin men jalynnyń lap qoiǵany, adamdardyń janushyra syrtqa qashyp shyqqany kórinedi. Bul sońǵy jyldary Tailandtaǵy eń iri ári adam shyǵyny kóp órtterdiń biri retinde baǵalanyp otyr.
