Álemge jarqyn da jas juldyzdardy syilaǵan "Baqytty bala" II ashyq festival konkýrsynyń bas júldegerleri 2 000 000 teńge aldy. Al reseilik "Golos. Deti" televiziialyq shoýynyń juldyzy "Baqytty bala" atty qazaqstandyq festival konkýrsynyń jeńimpazy atandy.
Nur-Sultan qalasynyń kishkentai turǵyny, jas vokalis Aikerim Tileýbek "Baqytty bala" II ashyq festival konkýrsynda "Golos. Deti" festival konkýrsynyń jeńimpazyna aitarlyqtai básekelestik tanytty. Iaǵni, "DimashAli" prodiýserlik ortalyǵy ǵalamdyq deńgeidegi taǵy bir jańa da jas óner juldyzyn tanytty. Ol, árine, elordalyq óner iesi Aikerim Tileýbek.
Baiqaýdyń qorytyndysyn anyqtaý barysynda uiymdastyrýshylar – "DimashAli" prodiýserlik ortalyǵy men shaqyrylǵan sarapshylar kádimgidei qiyn jaǵdaiǵa tap boldy. Qyzý pikirtalas tún jarymyna deiin jalǵasty. Nátijesinde tóreshiler alqasy ymyraǵa kelip, eki qatysýshyǵa bas júlde beretin bolyp sheshti. Al júlde qorynyń kólemi aldyńǵy konkýrstan eselep artty.
Aita ketý kerek, Qazaqstanda osyndai aýqymdy is-shara Aqtóbe oblysy ákimdiginiń jáne Aqtóbe qalasyndaǵy jeke kompaniialardyń qoldaýymen ótti. Baiqaý aldynda Aqtóbe oblysynyń ákimi Ońdasyn Orazalin qazylar alqasy múshelerimen jáne festival-baiqaýdy uiymdastyrýshylarmen kezdesti.
«Daryndy balalardyń "Baqytty bala" atty óner básekesi halyqaralyq mártebege ie boldy. Sonyń arqasynda qazaqstandyq óner ólkesindegi órender álemge belgili jerlesimiz Dimash Qudaibergen siiaqty esimderin tanyta bastady. Festival-baiqaýdyń ondaǵan, júzdegen jańa juldyzdardy ashatynyna senimim mol", - dep atap ótti oblys ákimi.
Kezdesý sońynda aimaq basshysy qonaqtarǵa estelik kádesyilar tabys etti.
Baiqaý bolatyn kún «Dimash Qudaibergen gala-shoýǵa bir kúnge ushyp keldi» degen qýanyshty habardan bastaldy. Balalar qobaljyǵanyn jasyra almady, olardyń árqaisysy úshin ózderiniń súiikti ánshisimen kezdesý – úlken arman. Biraq jetkinshekter ishki sezimge toly tolǵanystaryn basyp, sahnada úzdik óner kórsetýge janyn da, baryn da salyp baqty. Óz ana tilinde án shyrqaýdy talap etetin birinshi saiystyń ózinde kórermender úshin jeńiske úmitker anyqtalǵandai boldy. Nur-Sultan qalasynan kelgen Aikerim Tileýbek "Jumaq meken" ánimen tyńdarmandardy baýrap aldy, kópshilik oǵan uzaq ýaqyt boiy qol shapalaqtap, ystyq yqylastaryn bildirdi.
Álemdik deńgeidegi tanymal hitterdiń perfomanstary oryndalatyn ekinshi kezeńde uiymdastyrýshylar jas shamasyna shekteý qoimaǵanyn atap ótken jón. "DimashAli" prodiýserlik ortalyǵynyń jetekshisi Qanat Aitbaev aitqandai, munda qatysýshylar ózderiniń vokaldyq qabiletteri men sahnalyq talanttaryn meilinshe aiqyn kórsetetin ánder tańdaýy óte mańyzdy.
"Balalar tamasha óner kórsetti! Tamashasy sol, tipti shyn myqtyny tańdaý men anyqtaý asa qiynǵa soqty. Alaida, baiqaý sharttary da oryndalýy tiis. Qazylar alqasy eshkimdi alalamai, óz mindetterin adal atqardy dep bilemin. Sońynda erekshe qorytyndy shyǵardy", - dedi baiqaýdyń qazylar alqasynyń múshesi Aida Nikolaichýk.
Júldegerlerdi sońynan bastap tanystyrsaq, qostanailyq Isatai Boltahan jáne Almaty qalasynyń úmitkeri Qaraqat Bashanova júldeli úshinshi oryndy qanaǵat tutty. Olardyń árqaisysy 100 000 teńge somasynda syilyq sertifikatpen marapattaldy. Ekinshi orynǵa Ýkrainanyń Harkov qalasynan kelgen Darina Galitskaia men aqtóbelik Ańsar Júsip laiyq dep tanyldy. Olarǵa 150 000 teńge kólemindegi sertifikattar tabys etildi. Al birinshi oryndy Reseidiń Týla qalasynan kelgen Mariia Paniýkova men almatylyq Nurlybek Saparbai jeńip aldy. Básekelesterinen óner báigesinde oza shapqan jas ánshiler 250 000 teńge kólemindegi sertifikattarǵa ie boldy.
Segiz memleketten kelgen tańdaýly ánshilerdiń armanyndaǵy Bas júlde, dástúr boiynsha, sarapshylar alqasyn tamsandyryp, ǵajap ónerimen konkýrs dárejesin kótergen eń myqty eki qatysýshyǵa tabystaldy. Olar, joǵaryda aitqanymyzdai, elordanyń týmasy Aikerim Tileýbek pen Reseidiń Túmen qalasynan kelgen Islam Balkoev – "Baqytty bala" II ashyq festival konkýrsynyń jańa qos juldyzy. Bas júldeni jeńip alǵandardyń árqaisysyna 1 000 000 teńge somasynda sertifikattar tabys etildi.
Taǵy da aitaiyq, Islam Balkoev "Pervyi kanal" arnasynan kórsetiletin "Golos. Deti" atty televiziialyq joba boiynsha kópshilikke tanymal. Reseidiń basty vokaldyq shoýynda Valerii Meladzeniń jetekshiligimen óner kórsetý Islamǵa kóp kómegin tigizdi. Onyń ónerine pikir bildirgen Qazaqstannyń eńbek sińirgen mádeniet qairatkeri, Dimashtyń pedagogi Marat Áitimov bylai dedi: "Islam talantymen qatar, erekshe daryny men sahnalyq sheberligin tanyta bildi. Álbette, onyń sahna adamy ekeni daýsyz! Ol aýditoriiamen jumys istei alady, sahnanyń sánin keltirdi. Naǵyz ártis úshin jaqsy vokaldyq qabileti bolý jetkiliksiz, naǵyz ártis san alýan qasietterge ie bolýy tiis, eń bastysy – ándi Dimashtai júrekpen jetkize bilý qajet.
Mysaly, sheberlik saǵaty barysynda men Islamǵa onyń horeografiiasyna qatysty birneshe eskertý jasadym. Bii shikileý boldy, ashyǵyn aitqanda, onyń deńgeiine laiyq emes edi. Is-qimyldary sál qysyńqy bolatyn. Islam meni muqiiat tyńdap, pysyqtaýǵa ýáde berdi. Sóitip, final kezinde múldem jańa qoiylymymen tánti etti! Osyndai qysqa merzimde ol barlyq kemshilikterdi joiyp, bidi jaqsy alyp shyqty. Bul, álbette onyń joǵary kásibiliginiń kórsetkishi".
Aikerim Tileýbek Dimash Qudaibergenmen birge onyń kelesi kontsertinde án shyrqaý qurmetine ie bolǵany belgili boldy.
Eske sala keteiik, "Baqytty bala" festival konkýrsynyń I maýsymynyń finalisi Narǵyz Januzaq Londonda ótken Indigo at the O2 kontsert zalynyń sahnasynda áigili ánshimen birge mega-juldyzdarmen dýette óner kórsetti. Al ekinshi Bas júlde iegeri Erjan Maksim reseilik "Golos. Deti" tanymal jobasynda máskeýlik kórermenderdi darynymen tamsandyra bildi.
