© Sputnik / Tabyldy Kadyrbekov
Almaty oblysynda taekvando bapkeri 14 jastaǵy qyzǵa seksýaldyq sipattaǵy áreket jasady dep aiyptaldy, dep habarlaidy Sputnik Qazaqstan.
Qylmystyq is kámelet jasqa tolmaǵandardyń isteri jónindegi mamandandyrylǵan aýdanaralyq sotta qaralyp jatyr. Sot protsesi 4 sáýirde Qaskeleń qalasynda bastalǵan. Kelesi otyrys 18 mamyrda ótedi.
"Sot otyrysy jabyq ótip jatyr. Kúdikti sotqa kelip júr, eshqaida ketpeý týraly qolhat berdi. Qylmystyq is 122-bap, iaǵni 16 jasqa tolmaǵan adammen jynystyq qatynas nemese seksýaldyq sipattaǵy ózge de áreketter jasaý isi boiynsha tergeldi", - deidi sot mamandary.
Oqiǵa halyq arasyndaǵy rezonans týǵyzdy. "Nemolchi.kz" qory tergeý sharalaryn jiti baqylap otyrǵan. Sot protsesin de qadaǵalap jatyr.
Qoǵam belsendileriniń aitýynsha, basynda politseiler 120-bap (Zorlaý) jáne 121-bap (Seksýaldyq sipattaǵy zorlyq-zombylyq áreketteri) boiynsha tergeý sharalaryn júrgizgen. Artynan 122-bapqa (16 jasqa tolmaǵan adammen jynystyq qatynas nemese seksýaldyq sipattaǵy ózge de áreketter jasaý) aýystyrdy. Ol baptyń jazasy jeńildeý.
Aita keteri, 122-baptyń 1-tarmaǵy boiynsha belgili bir laýazymdardy atqarý nemese belgili bir qyzmetpen ainalysý quqyǵynan ómir boiyna aiyra otyryp, bes jylǵa deiingi merzimge bas bostandyǵyn shekteý nemese sol merzimge bas bostandyǵynan aiyrý jazasy qarastyrylǵan.
"Qylmystyq kodekstiń 122-baby - bul pedofilder, ásirese, balalarǵa arnalǵan sporttyq mektepterdegi pedofilder úshin kádimgidei mereke", - deidi "Nemolchi.kz" qorynyń basshysy Dina Smaiylova.
