QR Ekologiia, geologiia jáne tabiǵi resýrstar ministrligi Qyzylorda oblysy Aral aýdany Toqpan kólinde balyqtardyń qyrylýyna qatysty túsinikteme berdi, dep habarlaidy "Ult aqparat" vedomstvonyń baspasóz qyzmetine baspasóz qyzmetine silteme jasap.
«Ekologiia departamentiniń, veterinarlyq qyzmet, «Qazgidromet» RMM jáne «Balyq sharýashylyǵy ǵylymi-óndiristik ortalyǵy» JShS-nyń mamandary laboratoriialyq zertteýler men sanitarlyq – himiialyq taldamalar júrgizý úshin sý men ólgen balyq synamalaryn aldy. Qazirgi ýaqytta ólgen balyqtardy jinaý jáne joiý jumystary júrgizilýde.
Balyqtardyń qyrylý sebepteri týraly aqparat laboratoriialyq zertteýlerdiń qorytyndylary daiyn bolǵan soń qosymsha habarlanady», delingen habarlamada.
Eske sala ketsek, 4 qyrkúiekte Qyzylorda oblystyq orman sharýashylyǵy jáne janýarlar dúniesi aýmaqtyq inspektsiiasyna WhatsApp messendjeri arqyly Qyzylorda oblysy Aral aýdany Toqpan kólinde balyqtardyń qyrylýy týraly aqparat túsken.
4-5 qyrkúiekte óńirlik inspektsiia, Qamystybas aýyl ákimdiginiń, «Balyq sharýashylyǵy ǵylymi-óndiristik ortalyǵy» JShS Aral filialynyń, «Qazgidromet» RMM filialynyń, Aral aýdany APB, veterinarlyq qyzmet, Qyzylorda oblysynyń Tabiǵat resýrstary jáne tabiǵat paidalanýdy retteý, Jumyldyrý daiyndyǵy basqarmalarynyń, Tótenshe jaǵdailar, Ekologiia departamentteriniń mamandarynan quralǵan komissiia oqiǵa ornyna bardy.
Mamandar jaǵalaýdy zerttep, 6,4 tonna ólgen balyqty jinaǵan. Balyqtardyń 96% – taban balyǵynyń shabaqtary, qalǵany –torta, qylysh balyq, sazan jáne kókserke balyqtarynyń shabaqtary bolǵan.
Aita keterligi, Toqpan kóli Qyzylorda oblysy Aral aýdany Qamystybas kóliniń soltústik batys betkeiinde ornalasqan, jergilikti mańyzy bar balyq sharýashylyǵy sý aidyndarynyń tizbesine enbegen, onda negizinen taban balyǵy kóp mekendeidi.
