Almaty oblysy Balqash aýdany aýmaǵynda orman alqaptary órtendi, dep habarlaidy "Ult aqparat" QR EGTRM orman sharýashylyǵy jáne janýarlar dúniesi komitetine siltememen.
«4 sáýirdegi Balqash aýdanynyń jer qorynda bolǵan dala órti qatty jeldiń áserinen Kúrti OShKMM Taý-Qum ormanshylyǵyna aýysqan. 2021 jyly 15 sáýirde «Qazáýeormanqorǵaý» RMQK ushaǵymen áýeden baqylaý júrgizildi. Ushqysh baqylaýshy bergen aqparatqa sáikes, jel jyldamdyǵynyń toqtaýyna bailanysty órttiń taralýy toqtatylǵan», - dep jazylǵan komitet habarlamasynda.
Qazirgi ýaqytta Kúrti orman sharýashylyǵynan 30 adam, 1 órt sóndirý avtokóligi, 1 traktor, 5 jeńil avtokólik, aýdandyq TJB-dan – 1 kólik, 6 adam, «Qazáýeormanqorǵaý» mekemesinen – 9 adam, Jeltorańǵy aýyldyq okrýginen – 6 adam orman órtin sóndirýge kirisken.
Órt sóndirý kezinde eshkim jaraqat alǵan joq. Órttiń aýmaǵy men keltiriligen zalal kólemi, órt tolyq joiylǵannan keiin eseptelip, qosymsha usynylady.
«Sonymen birge, 15 sáýirde saǵat 12:00-degi aqparat boiynsha, órt «Ile-Balqash» memlekettik tabiǵi rezervatynyń Ile saǵasynda 10-15 shaqyrym jerde bastalyp, rezervattyń 13 oramy 1 telimine aýysqan. Órt bolyp jatqan jer – sýly-batpaqty aýmaq. Órtti sóndirýge rezervattan 2 avtokólik pen 9 adam jiberilgen», - dep habarlady komitet.
