Qazaqstanda mektep oqýshylarynyń tegin tamaqtanýyn baqylaýdyń jańa tártibi engiziledi. Endi ata-analar balasynyń mektep ashanasynda tamaqtanǵan-tanbaǵanyn eGov arqyly teksere alady. Al memleket mekteptegi tamaqtandyrý qyzmetine tólemdi tek oqýshynyń tamaqtanǵany rastalǵan jaǵdaida júrgizedi, dep habarlaidy ult.kz.
Qazir az qamtylǵan otbasylardan shyqqan balalarmen qatar, 1-4 synyp oqýshylarynyń barlyǵy mektepte tegin ystyq tamaqpen qamtamasyz etiledi. Buǵan biýdjetten arnaiy qarajat bólinedi.
Jańa júie boiynsha bala mektepke kelmese nemese ashanada tamaqtanbasa, sol kúngi tamaqtaný aqysy tólenbeidi. Iaǵni mektep ashanalaryna qarajat oqýshynyń naqty tamaqtanǵanyn rastaityn derekter negizinde aýdarylady.
«Biyldan bastap mektepterdiń tamaqtaný qyzmetine aqy tóleý tek rastalǵan derekter negizinde júrgiziledi. 1 qyrkúiekke deiin tiisti tizimderdi qalyptastyryp, daiyndyq jumystaryn qamtamasyz etý qajet», – dedi Jasandy intellekt jáne tsifrlyq damý vitse-ministri Rostislav Koniashkin.
Ata-analar balasynyń mektepte tamaqtanǵanyn eGov Mobile qosymshasyndaǵy «Qyzmetter» → «Áleýmettik ámiian» → «Ystyq tamaq» bólimi arqyly kóre alady.
Al oqýshynyń tamaqtanǵanyn tirkeý úshin mektep ashanalarynda QR-kod, karta, Face ID nemese ózge de sáikestendirý tásilderi qoldanylmaq. Júie osy derekter negizinde balanyń tamaqtanǵanyn rastap, aqparatty ata-anaǵa jetkizedi.
Bul jańashyldyq tegin tamaqtandyrý júiesiniń ashyqtyǵyn arttyrýǵa baǵyttalǵan. Iaǵni buǵan deiin synyptaǵy oqýshylardyń sanyna qarai esepteletin qarajat endi naqty tamaqtaný faktisimen bailanystyrylmaq.
Ministrlik málimetinshe, ótken oqý jylynda «Áleýmettik ámiian» júiesi arqyly oqýshylarǵa 149 mln teńgege ystyq tamaq berilgen. Al tsifrlyq vaýcher qyzmetin 1,5 mln-nan astam ata-ana iske qosqan.
Jańa baqylaý tetigi qyrkúiek aiynan bastap barlyq mektepte qoldanylýy tiis. Endi ata-ana balasynyń mektepte tegin tamaqtanǵanyn úiden shyqpai-aq baqylai alady.
