Alaiaqtar qazaqstandyqtardy aldaýdyń jańa tásiline kóshti. Qaskóiler jasandy intellekt kómegimen adamnyń daýysyn ainytpai salyp, onyń týysyna qaýip tóngenin aityp, shuǵyl aqsha suraidy. Mundai qýlyqqa ásirese egde jastaǵy adamdar jii aldanyp qalady, dep habarlaidy ult.kz.
Bul týraly Astana qalasy prokýratýrasynyń basqarma prokýrory Talant Qaliev Óńirlik kommýnikatsiialar qyzmetinde ótken brifingte aitty.
Prokýrordyń sózinshe, alaiaqtar áleýmettik injeneriia ádisterin belsendi qoldanyp jatyr. Sonyń ishinde jasandy intellekt arqyly adamnyń daýysyn kóshirip, jaqyn týysynyń atynan qońyraý shalatyn jaǵdailar kóbeigen.
Qaskóiler telefon arqyly adamnyń balasy, nemeresi nemese basqa jaqyn týysy qiyn jaǵdaiǵa tap bolǵanyn aityp, dereý aqsha jiberýdi talap etedi. Mysaly, jol-kólik oqiǵasyna túskenin nemese basqa da keleńsiz jaǵdaiǵa tap bolǵanyn aityp, kómek suraýy múmkin.
«Mundai tuzaqqa kóbinese egde jastaǵy adamdar túsedi. Olar ózderine balalary nemese nemereleri habarlasyp tur dep oilaidy. Tanys daýysty estigen soń, birden kórsetilgen nómirge aqsha aýdarady», – dedi Talant Qaliev.
Prokýror mundai qońyraý túsken jaǵdaida aqshany birden aýdarmaýǵa shaqyrdy. Onyń aitýynsha, adamnyń daýysyn estigenniń ózinde aqparatty mindetti túrde tekserý qajet.
«Qońyraýdy birden úzip, jaqyndaryńyzǵa ózińizge belgili nómir arqyly qaita habarlasyńyz. Onyń shynymen kómekke muqtaj ekenin anyqtap alyńyz. Mundai jaǵdaida tek daýysqa senýge bolmaidy», – dep eskertti prokýror.
Mamandardyń aitýynsha, alaiaqtardyń basty qarýy – adamnyń qorqynyshy men asyǵystyǵyn paidalaný. Sondyqtan kútpegen qońyraý kezinde sabyr saqtap, aqparatty birneshe jolmen tekserý – aqshańyzdy saqtap qalýdyń eń qarapaiym tásilderiniń biri.
