Búgingi balalardy gadjetten alystatý qiyn zamanda olardy kitapqa baýlý, durys ádetter qalyptastyrý qiynnyń qiiametine ainaldy. Keide tipti tańdy tańǵa uryp kompiýter oiyndary men áleýmettik jelilerden bas almaityn da balalar bar ekeni jasyryn emes. Kógildir ekranaǵa telmirgen balany uiyqtatamyn dep áýre-sarsańǵa túsken ata-analar jetip artylady.
Balada uiqy rejiminiń durys qalyptasýy onyń fizikalyq jáne mentaldy damýyna zor yqpal etedi deidi mamandar. Sondyqtan balaqandardy belgili bir ýaqytta uiqyǵa jatqyzý úshin arnaiy ritýaldar jasaǵan jón. Mysaly uiqy aldynda jýyný, pijama kiiý, tósek salý siiaqty áreketterdiń ózi balanyń miyn uiqyǵa daiyndaityn kórinedi. Sóitip, onyń tez uiyqtap ketýine múmkindik beredi. Osy ádetterge uiqy aldynda az-kem kitap oqý daǵdysyn da jatqyzýǵa bolady eken.
Oqiǵalarǵa toly belsendi kúnnen keiin, balanyń sanasyn tynyshtandyratyn kitap oqý mańyzdy deidi psihologtar. Olar oqiǵalary birqalypty órbitin, balanyń nazaryn jaǵymdy oilarǵa qarai bura alatyn, boiaýy asa qanyq emes, biraq kóńildi tústerden turatyn kitap bolǵany abzal.
24 qarashada balany uiqyǵa daiyndaityn «Uiyqtamaq» atty kitaptyń tanystyrylymy ótti. Kitap avtory IT mamany, ǵalym Áigerim Keýlimjai osy kitapty jazǵandaǵy maqsaty balalardy kitapqa baýlyp, durys ádet qalyptastyrý ekenin aitady.
«Ózim IT mamany bolsam da, balalarǵa arnalǵan taqpaqtar men ertegiler jazý bala kúnnen kele jatqan súiikti isim desem bolady. Balalarǵa arnalǵan kitap shyǵarýdy on jyldan beri armandap júrgen edim. Sonyń sáti endi tústi», -deidi Áigerim Keýlimjai.
Kitap avtorynyń sózinshe «Uiyqtamaqty» 1 jasqa tolmaǵan balalarǵa da oqyp berýge bolady. Sebebi kitaptaǵy kartinalar nárestelerdiń de qabyldaýyna aýyr timeidi.
Aita keteiik, sábilerge kitap oqý onyń aqyl-oiynyń damýyna, tanym-túsiniginiń keńeiýine jáne tiliniń anyq shyǵýyna septigin tigizedi deidi mamandar.
Áigerim Keýlimjai kitap shyǵararda kitaptyń mazmuny, kólemi, pishini men qoldanylǵan illiýstratsiialar jáne tústerdi psiholog mamandarmen aqyldasa otyryp tańdaǵanyn aitady.
Kitapqa retsenziia bildirgen balalar jáne jasóspirimder psihology Symbat Aijaryqtyń pikirinshe «Uiyqtamaq» kitapbyn balalardy túngi uiqyǵa daiyndaýǵa arnalǵan kómekshi qural deýge bolady.
«Uiqyǵa keter aldyndaǵy turaqty ádet-daǵdy qalyptastyrý balanyń tynysh, jaqsy uiyqtaýyna kómektesedi. Taqpaq túrinde bolýynyń artyqshylyǵy - jattaýǵa ońai ári ret-retimen, ózdiginen áreket etýine septigin tigizip, ózine senimin nyǵaitady», -deidi psiholog.
«Uiyqtamaq» Áigerim Keýlimjaidyń alǵashqy kitaby. Ol osy seriadan taǵy 4 kitap shyǵarýdy josparlap otyr. Olar: «Úiretpek», «Elgezek», «Oianbaq» jáne «Jýynbaq» dep atalady.
