Jasóspirimderdiń túngi ýaqytta oiyn-saýyq oryndarynda bolýyna jol bergeni úshin 700-den astam kásipker jaýapkershilikke tartyldy. Bul týraly onlain brifingide QR IIM Ákimshilik politsiia komiteti iývenaldy politsiia jáne áielderdi zorlyq-zombylyqtan qorǵaý bólimi bastyǵynyń orynbasary Dilbar Tólegenova aitty, dep habarlaidy QazAqparat.
QR IIM Ákimshilik politsiia komiteti iývenaldy politsiia jáne áielderdi zorlyq-zombylyqtan qorǵaý bólimi bastyǵynyń orynbasary Dilbar Tólegenovanyń aitýynsha, Kámelettik jasqa tolmaǵandar arasyndaǵy quqyq buzýshylyqtyń aldyn alý maqsatynda politsiia organdary ishki ister organdarynda esepte turǵan 5000 jasóspirimmen, sondai-aq 8000-ǵa jýyq jumyssyz otbasylarmen jeke-jeke profilaktikalyq jumys júrgizedi (Bul otbasylarda 12000-nan astam bala tárbielenýde).
Biyl kámeletke tolmaǵandardyń túngi ýaqytta oiyn-saýyq oryndarynda nemese turǵyn úiden tys jerlerde zańdy ókilderiniń qaraýynsyz júrgeni úshin 57 myńnan astam ata-ana ákimshilik jaýapkershilikke tartyldy.
«Jasóspirimderdiń túngi ýaqytta oiyn-saýyq oryndarynda júrýine jol bergeni úshin 700-den astam kásipker jaýapkershilikke tartyldy. Kámeletke tolmaǵandardyń quqyqtary men zańdy múddelerin buzǵany úshin jyl saiyn 40 myńnan astam ata-ana men zańdy ókil ákimshilik jaýapkershilikke tartylady. Politsiianyń talaby boiynsha sot arqyly jyl saiyn myńǵa jýyq ata-anadan ata-analyq quqyqtarfynan aiyrylady nemese quqyqtary shekteledi», - deidi ol.
