Foto: Viktor Fediýnin/Kazinform
Eki balasyn tunshyqtyryp óltirgen áieldiń turmystyq zorlyq-zombylyq qurbany bolý yqtimaldyǵy tekseriledi. Bul týraly IIM Ákimshilik politsiia komitetiniń erekshe tapsyrmalar jónindegi aǵa inspektory Aqmaral Serikbaeva aitty, - dep habarlaidy «Ult aqparat» Kazinformǵa silteme jasap.
«Qazirgi ýaqytta bul oqiǵa boiynsha qylmystyq is qozǵalyp, ministrlik tarapynan qatań baqylaýǵa alyndy. Zańǵa sáikes, qylmystyq is boiynsha málimetter ázirshe qupiia, aitýǵa bolmaidy. Al bul otbasynda buryn turmystyq zorlyq-zombylyqtyń oryn alǵany ne almaǵany qylmystyq isti tergeý aiasynda tekserilip jatyr. Anyqtalatyn bolady. Bir aita keterlik jait, ol otbasynan Qyzylorda oblysynda da, Túrkistan oblysynda da turǵanda ishki ister organdaryna eshqashan shaǵym túspegen. Biraq, áielder otbasynda zorlyq-zombylyqqa kónip, aryz bermei júrýi de múmkin. Sondyqtan onyń bári qylmystyq isti tergeý barysynda tekserilip, qorytyndysy shyǵarylady», - dedi ol Ortalyq kommýnikatsiialar qyzmetindegi dóńgelek ústel barysynda.
Onyń atap ótýinshe, qylmystyq isterdi tergeý barysynda mundai jaittardyń bári sońyna deiin tyńǵylyqty qaralady.
«Mundai qylmystyq isterdiń qorytyndysynda kóbine otbasylyq qiynshylyqtardyń sebep bolǵany anyqtalady. Sonymen qatar qylmysty jasaǵan adam mineziniń psihikalyq aýytqýlary da sebep bolady», - dedi ol.
Esterińizge sala ketsek, 7 aqpan kúni Túrkistan qalasynda jaldamaly páterlerdiń birinen eki jas balanyń máiiti tabyldy.
Keiin atalǵan qylmysty jasaý kúdigimen balalardyń 31 jastaǵy anasy ustaldy.
