Dáýren Abaev oqýshylardyń mektepte eden jýýynan eshqandai jamandyq kórip otyrǵan joq. Aqparat jáne qoǵamdyq damý ministri kezinde ózi synypty qalai tazalaǵanyn eske túsirdi, dep jazady Sputnik agenttigi.
"Bilesiz be, mektepte qalai kezekshilik jasaǵanymyz, tolyq tazalaý jumysyn júrgizgenimiz áli esimde. Sonymen qatar, masaq terýge barǵanymyzdy qalai umytaiyn. Biz qyzylsha ósiretinbiz. Mektep aýmaǵyn kútip ustadyq. Sonymen birge barlyǵymyz sportpen shuǵyldanyp, úiirmelerge, diskotekaǵa baryp úlgeretinbiz", - dedi ol "Habar" telearnasyndaǵy "Otkrytyi dialog" baǵdarlamasynda.
Qazirgi mektep oqýshylarynyń kóbisiniń ata-anasy osy joldan ótken bolsa kerek, deidi Abaev. Múmkin tazalyq jasaǵan kúnderin saǵynyshpen, kúlkimen eske alatyn shyǵar, dep tolyqtyrdy ol.
"Jalpy men balalardy eńbekke tartýdan eshqandai jamandyq kórip turǵan joqpyn. Árine, birneshe mańyzdy nárse bar. Birinshiden, bul oqýǵa kedergi keltirmeýi tiis. Ekinshiden, bul erikti túrde bolýy kerek, qazir solai usynylyp jatyr. Mektep mundai sheshimdi ata-analarmen, oqýshylarmen birge qabyldaýy kerek", - deidi ministr.
Memleket balalardyń esebinen únemdeýge nemese ózderiniń keibir problemalaryn sheshýge tyrysyp jatqan joq, dep jalǵastyrdy Abaev. Eden jýýshylardy eshkim jumystan shyǵarmaidy, dep sendirdi ol.
"Eger áldekim qolyna shúberek alý qadir-qasietimdi kemsitedi, ata-anamnyń salyǵy onsyz da tazalyqshylardyń jalaqysyna ketedi dep oilasa, onda mundai oqýshyny, árine, partany tazalýǵa májbúrleýdiń qajeti joq", - dedi Abaev.
Onyń pikirinshe, mektepterde aqsha jinaýmen kúresip, oqýshylardy is-sharalarǵa qatysýǵa májbúrlemeý kerek.
"Alaida balalardy eńbekke tartýdan, jumys ornyn saqtaýdan ondai jaman eshteńe kórip turǵan joqpyn", - dep qorytyndylady ministr.
Áleýmettik jelilerde keibireýler elordalyq mektepterde oqýshylarǵa eden jýǵyzýǵa narazylyq bildirdi. Bilim jáne ǵylym ministrligi tazalyq jasaý árkimniń óz erki ekenin habarlady.
Al Nur-Sultan bilim basqarmasynyń basshysy Ánýar Janǵozin úlgi kórsetýge asyqty: ol qyzǵylt qolǵap kiip, keńsesin ózi tazalap shyqty.
Ulttyq testileý ortalyǵynyń direktory Didar Smaǵulov estafetany qabyldady.
