Almaty ákimi Baqytjan Saǵyntaev qalanyń selden qorǵaityn bógetter salynyp jatqan jerlerde bolyp, ózen arnalaryn jaqsartý jáne injenerlik kommýnikatsiialar salý barysymen tanysty, dep habarlaidy "Ult aqparat".
Megapolis ákimi Instagram paraqshasynda Esentai, Tiksai, Jarbulaq ózenderiniń jaǵalaýlaryn qaita qurý jáne abattandyrý barysy týraly aitty.
«Gidrotehnikalyq qurylysty qosa alǵanda, ózen arnalary retke keltirilmek. Jaǵalaýlar gabionmen nyǵaitylyp, qaraýsyz qalǵan ýchaskelerde jaiaý júrginshilerge arnalǵan joly bar jańa qoǵamdyq keńistik qurylady. Júrýge yńǵaily jol jabyndysy tóselip, qoiylatyn oryndyqtardyń tabiǵi materialdan bolýyna mán berdim», - dep jazdy Saǵyntaev.
Sonymen qatar, ákim Úlken Almaty men Aqsai ózenderi basseinderindegi bógetterdiń qurylys alańdaryn qarap shyqty. Onyń maqsaty – qalany selden qorǵaý. Bul ózenderdiń basseinderinde, taýlarda qaýipti úsh morenalyq kól bar.
«Qurylys jumystary kezinde qozǵalysqa shekteý qoiylýy múmkin. Jasyl ekonomika basqarmasyna jurtshylyqpen birlesip, májbúrli túrde kesilgen jasyl jelektiń ornyna ótemdik negizde egiletin jumystardy baqylaýdy tapsyrdym», - dedi Almaty ákimi B. Saǵyntaev.
Ákim Naýryzbai aýdanyna qarasty Qaraǵaily yqsham aýdanyndaǵy Tájiev kóshesiniń boiymen Qarǵaly ózeni arqyly ótetin kópirdiń jóndeý jumysyn, Aqjar men Tastybulaq yqshamaýdanyndaǵy injenerlik jelilerdiń qurylysyn kórip qaitty.
Saǵyntaev turǵyndarmen kezdesip, máseleni jeke baqylaýyna alatynyn aitty. Joba tolyq aiaqtalysymen joldar qalpyna keltiriledi. Sýmen jabdyqtaý jáne sý burý jelilerin júrgizý jumystarynyń sapasyna erekshe mán beriledi. Turǵyndar únemi habardar bolyp otyrady.
