Qalada epidemiologiialyq ahýal nasharlaǵan jaǵdaida Almaty jabyla ma? degen saýalǵa Baqytjan Saǵyntaev «Almaty» telearnasynyń tikelei efirinde jaýap berdi, dep habarlaidy QazAqparat.
«Biz Almaty qalasynyń kásipkerlerimen epidemiologiialyq ahýaldy jáne karantin shekteýleriniń tiimdiligin talqyladyq. Biz ártúrli nusqalardy qarastyryp jatyrmyz. Endi biz bizneske kómektesýdiń joldaryn qarastyramyz. Qazir qalanyń biýdjet tarapynan qandai qoldaý sharalaryn júzege asyratynymyzdy sheshemiz. Jumys toby quryldy. Ony talqylap, seisenbi kúni Úkimette usynamyz», - dedi ol.
Sonymen qatar, ol qalanyń jabylmaitynyn da atap ótti.
«Qala jabylmaidy. Qalany jabý jospary joq. Osyǵan deiin qabyldanǵan shekteý sharalary áser etip, jaǵdaidyń turaqtanýyna yqpal etedi degen úmittemin. 20 naýryzdan bastap shekteý sharalary engizildi. Keshe bas sanitarlyq dárigerdiń jańa qaýlysy shyqty. Karantin shekteýlerin taǵy eki aptaǵa sozý sheshimi qabyldandy. Barlyǵy ózimizge bailanysty. Karantin talaptaryn qatań saqtaý kerek, betperde kiip, áleýmettik araqashyqtyqty saqtap, kópshilik is-sharalar ótkizýden jáne kóp shoǵyrlanǵan jerlerge barýdan aýlaq bolý kerek», - dedi ákim.
