Qazaqstan Respýblikasynyń Memlekettik hatshysy Baqytjan Saǵyntaev Halyqaralyq áielder kúnine arnalǵan «Álemniń jaryǵy» atty merekelik kontsertke bardy, dep habarlaidy "Ult aqparat" Aqordaǵa silteme jasap.
Memlekettik hatshy kontsert aldynda Qazaqstan Prezidenti N.Á.Nazarbaevtyń atynan elimizdegi áielder qaýymyn Halyqaralyq 8 naýryz merekesimen quttyqtady.
Baqytjan Saǵyntaev Memleket basshysynyń quttyqtaý sózinde qoǵam ómirindegi jáne memleketti damytý isindegi áielderdiń róli airyqsha atalyp ótkeni týraly aitty.
– Sizder eldiktiń júgin er-azamattarmen birdei arqalap, san túrli salada tabysty eńbek etip, memleketimizdi nyǵaitýǵa, eldigimizdi baiandy etýge biregei úles qosyp kelesizder, – delingen quttyqtaýda.
Sondai-aq, Elbasynyń quttyqtaýynda áielder qaýymy shańyraqtyń berekesi men otbasylyq qundylyqtardy saqtap, búkil qoǵamnyń úilesimdi damýyna septigin tigizip otyrǵany jóninde aitylǵan.
– Barsha qazaqstandyq analarǵa jan-jaqty qoldaý kórsetip, qamqorlyq jasaý – er-azamattardyń boryshy jáne memlekettiń eń basty mindeti. Biz osy údeden shyǵý úshin aianbaimyz, – delingen quttyqtaý sózde.
Kontsertte «Astana Ballet», «Jastar» teatrlarynyń ónerpazdary, halyq ártisteri Á.Dinishev, R.Rymbaeva, sondai-aq tanymal oryndaýshylar R.Maltsagov, R.Nurjigit, Ayree, N.Kermenbaev, Á.Oqapov, A.Jorabaeva, «Jas sarbaz» balalar hory, Q.Ábildina stýdiiasynyń shákirtteri óner kórsetti.
