Baqytgúl Hamenovanyń isine qatysty sot otyrysy keiinge qaldy, dep habarlaidy QazAqparat.
Atyraý oblystyq sotynyń baspasóz qyzmetinen málim etkendei, oblys ákiminiń orynbasary Baqytgúl Hamenovanyń isine qatysty alǵashqy sot otyrysy keiin ótetin boldy.
«Sýdianyń ózge qylmystyq is boiynsha keńesý bólmesine ketýine bailanysty Baqytgúl Hamenovaǵa qatysty isti qaraý keiinge shegerildi», - dep málim etti sottyń baspasóz qyzmeti.
Baqytgúl Hamenovanyń isi Atyraý qalasynyń №2 sotynda qaralady.
26 mamyrda Atyraý qalasynyń №2 sotyna QR Qylmystyq kodeksiniń 366-babynyń 3-bóliginiń 2-tarmaǵymen Atyraý oblysy ákiminiń orynbasary Baqytgúl Hamenovaǵa, Atyraý oblysy Mádeniet, tilderdi damytý jáne arhiv isi basqarmasynyń basshysy Aqylbek Rysqalievke, QR Qylmystyq kodesiniń 367-babynyń 2-bóligimen «B» JShS-niń direktoryna qatysty qylmystyq is túsken.
«Osyǵan bailanysty basty sot otyrysyn ótkizý jóninde sheshim qabyldandy. Basty sot otyrysyn 2022 jylǵy 14 maýsymda saǵat 14:45-te ótkizý taǵaiyndaldy», - dep málim etken edi oblystyq sottyń baspasóz qyzmetinen.
Eske salaiyq, Atyraý oblysy ákiminiń orynbasary Baqytgúl Hamenova byltyr jeltoqsanda qamaýǵa alynǵan. Onymen birge mádeniet, arhivter jáne qujattama basqarmasynyń basshysy Aqylbek Rysqaliev para alý kúdigine ilingen.
Kúdiktilerge Abai eskertkishin jasaý jáne ornatý boiynsha 145 mln teńge somasyna memlekettik satyp alý shartyn jasaǵany úshin bir top adammen aldyn ala sóz bailasý arqyly JShS basshysynan 4,5 mln teńge somasynda para alý kúdigimen qylmystyq is qozǵaldy.
Keiin ol tergeý izoliatoryna qamaldy. Atyraý oblysy ákiminiń orynbasaryna qatysty qylmystyq is QR Qylmystyq kodeksiniń 366-babynyń 2-bóligimen tergeldi.
Baqytgúl Hamenova Atyraý oblysy ákiminiń orynbasary laýazymyn atqarýǵa 2020 jylǵy 13 naýryzda taǵaiyndalǵan.
