Búgin QR Parlamenti Májilisiniń depýtaty, Aýǵan soǵysy ardagerleri uiymdarynyń "Qazaqstan ardagerleri" qaýymdastyǵynyń jáne "Qazaqstan Respýblikasynyń áskeri-patriottyq sporttyq klýbtar federatsiiasynyń" tóraǵasy Baqytbek Smaǵul Almaty oblysy, Ile aýdany, M.Túimebaev aýylynyń jas sportshylarymen kezdesti, dep habarlaidy "Ult aqparat".
Sharaǵa "Saǵadat sardar" jattyǵý zalynda tálim alyp, djiý-djitsý, greppling, aralas jekpe-jek túrlerinen Álem, Aziia chempionattarynyń hám halyqaralyq jarystardyń jeńimpazdary atanyp júrgen 30-ǵa jýyq jasóspirim qatysty.
Kezdesý barysynda Baqytbek Smaǵul myrza eli úshin aianbai erlik etken ult maqtanyshtary Baýyrjan Momyshuly, Saǵadat Nurmaǵambetovter týraly ángimelerin aityp berdi. Odan bólek óz óleńderin oqyp, jiylǵan balalardyń rýhyn bir kóterip tastady.
Sonymen qatar jas ta bolsa aýyl sportyn damytý jolynda erinbei eńbek etip, qazaq balalaryn álemdik arenalarǵa shyǵaryp, olardyń biik tuǵyrlardan kórinýi jolynda ter tógip júrgen Nursultan Orynbasarovqa Ult Batyry óz kitaptaryn syiǵa tartty. Óz kezeginde Nursultan Orynbasarov ta qazaqtyń ata salty boiynsha syily qonaqtyń arqasyna shapan jaýyp, rizashylyǵyn bildirdi.
"Sportshylarymyz álemdik arenalarda el namysyn qorǵap, chempion atanýy úshin rýhy biik, patriot bolýy kerek. Jas órkenniń boiynda mundai qasietterdi qalyptastyrý úshin osyndai aǵalarymyzben jii kezdesýler ótkizip turýymyz shart", - deidi jas sportshy.
Sonymen qatar bul sharaǵa aýyl sportyn damýyna úlken úles qosyp júrgen Ile aýdanynyń máslihat depýtaty Daýtaliev Ǵani Saýytbekuly, Ashybulaq aýyldyq okrýgi ákiminiń orynbasary Meiirmanov Erlan Sairanuly, Ile aýdanynyń dene shynyqtyrý jane sport bóliminiń basshysy Ortybaev Qairat Əýelhanuly, Ile aýdanynyń dene shynyqtyrý jəne sport bóliminiń bas mamany Qabdikərimov Jənibek Bolathanuly sekildi el azamattary qatysqan.
Esterinizge sala keteiik, biyl aralas jekpe-jekten Aziia chempiony Nursultan Orynbasarov M.Túimebaev aýylynda "Halyq Qaharmany", Armiia generaly Saǵadat Nurmaǵambetovtyń qurmetine arnap "Saǵadat sardar" sport klýbyn ashqan bolatyn. Búginde bul klýbta jattyǵatyn jasóspirimder sany 80-nen asty.
Nurtýǵan Bekmurat
