Qala ákimi Baqyt Sultanovtyń qabyldaýynda bolǵan turǵyndardyń kópshiligin baspana máselesi mazalaidy, dep habarlaidy Elorda Info.
Elorda basshysynyń jeke qabyldaýynda 50-ge jýyq qala turǵyny bolyp, óz máselelerin jetkizdi. Ákim qabyldaýyna jazylǵandardyń negizgi bóligi kóp balaly analar, olardyń kótergen máseleleri - baspana, jumys jáne erekshe kútimdi talap etetin balalary úshin jaǵdai jasaý.
Baqyt Sultanov ákimdikke kelgen árbir azamatty jeke qabyldap, qandai suraqtar mazalaitynyn tyńdai kele, orynbasarlary men tiisti basqarma basshylaryna tapsyrma berdi.
«Men sizderdi qabyldaýǵa jáne suraqtaryńyzǵa jaýap berýge árqashan ázirmin. Osynda kelgen azamattardy tolǵandyrǵan saýaldar meni de mazalaidy. Bárin qyzyqtyratyn baspana máselesi jaiyna kelsek, qala boiynsha kommýnaldyq turǵyn úi qorynda baspana kezeginde 45 myńnan astam adam tur, onyń 20 myńnan astamy - túrli áleýmettik az qamtylǵan toptarǵa jatady», - dedi B. Sultanov.
Sonymen qatar, qala basshysy ákimdik tarapynan beriletin turǵyn úi sertifikattarynyń sanyn 2 myńǵa deiin ulǵaitatynyn aityp ótti. Osy tusta aityp ótken jón 1 mln teńgeni quraityn turǵyn úi sertifikaty, ótken jyly 100 biýdjet salasy qyzmetkerlerine tabys etildi.
«Sizderdi jeke qabyldaýym qyzmettik mindetinen bólek, aldaǵy ýaqytta ne isteý kerek, qandai sharalar qabyldaý qajettigin saraptaý úshin de mańyzdy. Qazirgi tańda baspana máselesin sheshý joldaryn qarastyrýdamyz. Sonyń ishinde kezekte turǵan turǵyndardyń áleýmettik osal toptaryna belgili ýaqyttan keiin satyp alý quqyǵymen páterlerdi jalǵa berý múmkindigi usynylady. Bul degenimiz - azamattar tapqan aqshasyn páter iesine emes, óz menshigine ótetin páter úshin quiýǵa múmkindik alady degen sóz», - deidi ol.
Ákimniń aitýynsha, baspana máselesin ár otbasyna jeke taldaý jasai otyryp, júieli túrde sheshý qajet.
«Byltyr 180 páter paidalanýǵa berilse, biyl 500, eger qoldan kelse, odan da asyrýǵa tyrysamyz. Taǵy bir aityp ketetin dúnie, qala biýdjeti túbi joq qudyq emes, onyńda shegi bar jáne jumsalýy tiis salasy bar. Kóp azamattar oilaidy ákimdikte turǵyn úi qory bar jáne oǵan bólinetin bólek qarajat bar dep. Adam birnársege qol jetkizý úshin eńbektený kerek. Siz jumys isteńiz, eńbektenińiz, bul baǵytta memleket tarapynan barlyq múmkindik jasalǵan. Sondyqtan da tegin úi degen túsinikten arylý qajet», - dedi qala ákimi.
