Foto: QR ǴJBM
Ahmet Baitursynuly atyndaǵy Qostanai óńirlik ýniversitetiniń stýdentteri oqytýshylarynyń jetekshiligimen eki jyl boiy ozyq mashina jasaý ortalyǵynda jarysqa arnalǵan avtokólik – bolid qurastyrdy, dep habarlaidy Ult.kz.
Jobanyń ideiasyn ázirleýden bastap, modeldi jobalaý jáne bólshekterdi qurastyrýǵa deiingi barlyq kezeń tolyqtai ýniversitet qabyrǵasynda júzege asyryldy.
Bolidti saltanatty tanystyrý rásimine avtomobil jasaý salasyndaǵy kásiporyn ókilderi qatysty. Aita ketý kerek, Qostanai óńiri Qazaqstannyń avtokólik ónerkásibiniń jetekshi ortalyqtarynyń biri sanalady. Munda birneshe tanymal brendtiń avtokólikteri tabysty túrde qurastyrylyp keledi.
QÓÝ rektory Seitbek Qýanyshbaevtyń aitýynsha, bul joba – bilim berý men óndiristi yqpaldastyrýǵa baǵyttalǵan mańyzdy bastama.
«Joba ideiasy 2023 jyl basynda paida boldy. Qostanaida tolyqqandy otandyq brend qalyptastyrý úshin osyndai stýdenttik bastamalardan bastaý qajet. Bizdiń negizgi mindetimiz – mashina jasaý salasyna daiyn mamandar daiarlaý. Stýdentter oqý barysynda avtokóliktiń qalai qurastyrylyp, qalai jumys isteitinin tájiribe júzinde meńgerýi tiis», – dedi rektor.
Bul bolid – Qazaqstanda stýdentter men oqytýshylardyń kúshimen tolyqtai jasalǵan alǵashqy avtokólikterdiń biri. Árbir bólshek aldymen tsifrlyq formatta jobalanyp, kompiýterlik synaqtardan ótti. Sátti simýliatsiialardan keiin ǵana sońǵy nusqasy daiyndaldy.
Joba ýniversitet pen seriktes uiymdardyń birlesken eńbeginiń nátijesinde júzege asty. Seriktester bólshekterdi stanoktarda óńdeýge jáne importtyq komponentterdi satyp alýǵa qoldaý kórsetti. Bir oryndyq jarys bolidi nebári úsh sekýnd ishinde 100 km/saǵ jyldamdyqqa deiin údei alady. Kóliktiń tehnikalyq múmkindikterin mashina jasaý, energetika jáne aqparattyq tehnologiialar fakýltetiniń stýdentteri tájiribe júzinde kórsetti.
QÓÝ-dyń ozyq mashina jasaý ortalyǵynyń basshysy Valerii Sisinniń aitýynsha, aldaǵy ýaqytta stýdentter halyqaralyq «Formýla-stýdent» injenerlik jarysyna qatysýdy josparlap otyr.
«Bul jarys aiasynda stýdentter nólden bastap jarys bolidin jobalap, eseptep, qurastyrady. Joba «qatań inkýbator» qaǵidasy boiynsha iske asady. Nátijesinde túlekter teoriialyq bilimmen qatar praktikalyq daǵdylardy tolyq meńgerip, otandyq avtopromdy damytýǵa nemese joǵary tehnologiialyq salalarda jumys isteýge daiyn maman retinde qalyptasady. Stýdentter teoriialyq zertteýlerden bastap, kompiýterlik modeldeý jáne sandyq basqarylatyn stanoktaryna arnalǵan baǵdarlamalar ázirleýge deiin tolyq tsiklden ótedi», – dedi ol.
