Nursultan Nazarbaev Birikken Arab Ámirlikteriniń Qazaqstan Respýblikasyndaǵy Tótenshe jáne Ókiletti Elshisi Muhammed ál-Djabermen kezdesti, dep habarlaidy "Ult aqparat" Elbasynyń resmi saityna silteme jasap.
Kezdesý barysynda eki jaqty qatynastardy nyǵaitýdyń, Qazaqstan men BAÁ arasyndaǵy ózara tiimdi yntymaqtastyqty damytýdyń, mádeni bailanystardy keńeitýdiń mańyzdylyǵy jaily aityldy.
- Qazaqstan táýelsizdigin alǵannan beri bizdiń qarym-qatynasymyz óte qarqyndy damyp keledi. Biz árdaiym BAÁ basshylyǵymen tyǵyz bailanysta boldyq. Osynyń arqasynda elderimiz arasyndaǵy vizasyz rejim máselesin sheshtik, reisterdiń sanyn kóbeittik. Bul týristerdiń artýyna jol ashyp, tutastai ekonomikalyq qatynastardyń keńeiýine áser etti, - dedi Nursultan Nazarbaev.
Óz kezeginde Muhammed al-Djaber BAÁ basshylyǵy atynan Qazaqstannyń odan ári tabysty damýy men órkendeýin tilei otyryp, Nursultan Nazarbaevty jáne Qazaqstan halqyn Táýelsizdik kúnimen quttyqtady.
- Qazaqstan - Ortalyq Aziiadaǵy mańyzdy seriktesterdiń biri. Biz vizasyz rejim týraly kelisimge qol jetkizýdi oń baǵalaimyz. Bul kásipkerler arasyndaǵy bailanyst jeńildetýge jáne investitsiialyq belsendilikke yqpal etedi, - dedi Elshi.
Sonymen qatar, diplomat Nursultan Nazarbaevqa mártebeli sheih Fatima bint Muhammed bin Zaidtiń gýmanitarlyq jobasy aiasynda jasalǵan «Beibitshilik kilemin» tabystady.
Aita keteiik, «Beibitshilik kilemi» jobasy kilem toqýdyń dástúrli qolónerin nasihattaýǵa jáne soǵys beineleriniń osy ónerge enýine qarsy turýǵa baǵyttalǵan. Joba aiasynda qolónershiler beibit jáne gúldengen ómir týraly ózderiniń kózqarastarymen kilemder toqidy.
Ol - áskeri qaqtyǵys, jaýyngerler men qarý-jaraq beinelengen «soǵys» taqyrybyndaǵy aýǵan kilemderin jasaý dástúrine qarsy baǵyttalǵan joba.
