Almaty ákimdigi «Aziia daýysy» festivalin qaita jańǵyrtýdy josparlap otyr. Bul týraly Erbolat Dosaev málim etti, dep habarlaidy QazAqparat agenttigi.
Qala ákimimen kezdesýge kelgen Áýezov aýdany turǵyndarynyń biri Almatyda ótetin mádeni is-sharalarǵa qatysty suraq qoidy.
«Men jaqynda Dimash Qudaibergenniń kontsertine bardym. 30 myńnan astam adam boldy, onyń jartysy – týrist. Osyndai kontsertterdiń jii ótkizilip turǵanyn qalaimyn, osylaisha qalanyń mýzykalyq astanaǵa ainalýyna múmkindik týady – adamdar keledi, jumys oryndary ashylady. Bizde tanymal didjei Imanbek bar, ony da shaqyrýǵa bolady. Almatynyń mádeniet pen mýzykany damytýǵa múmkindikteri bar dep oilaimyn», - dedi ol.
Erbolat Dosaev Mádeniet jáne sport ministrligimen birlese otyryp, «Aziia daýysy» jáne basqa da mýzykalyq festivalderdi jańǵyrtý josparda bar ekenin atap ótti.
«Máslihat qoldaǵan Almaty qalasyn damytý baǵdarlamasynda aýqymdy josparlar bar. Jyl saiyn adamdar bizge kelýi úshin kem degende 30 turaqty is-sharany josparlap otyrmyz. Mádeniet jáne sport ministrligimen birlese otyryp, «Aziia daýysy» jáne basqa da tarihi qalyptasqan mýzykalyq festivaldar men is-sharalardy jańǵyrtý kózdelgen. Dimash Qudaibergenniń kontsertine keler bolsaq, bul – Ortalyq stadionda sońǵy 25 jylda alǵash ret jasalǵan eksperiment. Óte jaqsy ótti. «Medeýdegi» festivaldi qaitarǵymyz keledi. Usynysyńyzǵa rahmet», - dedi shahar basshysy.
