Májilistiń jalpy otyrysynda depýtaty Darhan Myńbai otbasy máselelerine qatysty QR Premer-Ministriniń orynbasary Eraly Toǵjanovtyń atyna saýal joldady, dep habarlaidy QazAqparat.
«Nur Otan» partiiasynyń sailaýaldy baǵdarlamasynda da otbasyn qoldaý jáne nyǵaitý – elimizdiń tabysty damýynyń kepili dep kórsetilgen. Ony oryndaýǵa, iaǵni halyqtyń laiyqty ómir súrýine zańnamalyq, áleýmettik jáne jan-jaqty qoldaýǵa zań turǵysynan barynsha múmkindikter jasalyp keledi. Óitkeni, turaqty otbasyn qurý, kópbalaly bolý – ultymyzdyń sanyn eselep arttyrýdyń negizi. Alaida, qoǵamdaǵy otbasy institýtynyń álsireýi, onyń ishinde nekelesý sanynyń azaiýy men ajyrasý faktileriniń ósýi kúrdeli máselege ainaldy. Sońǵy jyldary bul problema jastar arasynda da kóbeiip bara jatqandyǵy jasyryn emes. Yqylym zamannan urpaq órbitip, kóbeiýdi ósiet etken salt-dástúrimizdi ustanýǵa ne kedergi? Bárin áleýmettik jaǵdaiǵa siltei salý qisyndy ma? Bizdińshe, óte mańyzdy problemanyń tereń túbiri – jastardyń tárbiesinde, olardyń ortasyna bailanysty siiaqty», - dedi D. Myńbai.
Osy oraida ol ajyrasý kezinde balalar eń kóp zardap shegetinin atap ótti.
«Dúnie-múlik bólisý, balalardyń turǵylyqty jerin anyqtaý daýy, aliment, týystyq qatynastardyń úzilýi siiaqty máselelerdiń aýyrtpalyǵy da, moraldy-áleýmettik qiynshylyqtary da jeterlik.
Tolyq emes otbasyda tolyqqandy bozbala men boijetkendi tárbieleý de ońai bolmas. Otbasy jaily ulttyq baiandama men resmi statistikalyq málimetter boiynsha 2015-2019 jyldar aralyǵynda ajyrasqan otbasylardyń sany 274,5 myńdy qurap, iaǵni jalpy tirkelgen nekelermen salystyrǵanda, ajyrasý sany 43 paiyzǵa deiin kóterilgeni baiqaldy», - dedi depýtat.
Onyń aitýynsha, 2019 jyldyń qorytyndysy boiynsha 59 796 (119 592 adam) neke buzylǵan.
«Sol jyly 120 myńǵa jýyq adam nekesin buzsa, onyń árbir ekinshisi, iaǵni 60 myńnan astamy 18-35 jas aralyǵyndaǵy jastar. Ajyrasýlardyń basym bóligi 30-34 jas aralyǵyndaǵy jas otbasylarǵa tiisti. Ǵalamdyq indetke bailanysty úilený men ajyrasý tómendegenin eskergenniń ózinde, bul jaǵdaiǵa bei-jai qaraýǵa bolmaidy», - dedi D. Myńbai.
Joǵaryda baiandalǵan aqparattardyń negizinde ajyrasý jaǵdailaryn azaitý úshin, sondai-aq bul úrdisti tejeý maqsatynda mynadai usynystar engizildi:
1. Orta jáne joǵary oqý oryndarynda otbasy mádenieti qundylyqtaryn saqtaýǵa, qasterleýge baǵytalǵan ozyq tájiribeni oqytý jáne nasihattaý boiynsha arnaiy fakýltativterdi engizýdi qarastyrý;
2. Sot aldyndaǵy otbasylyq mediatsiia sarapshylarynyń jumysyn yntalandyrýǵa, erli-zaiyptylardyń tatýlastyrý merzimin barynsha uzartýǵa, iaǵni olardyń raiynan qaitýyna múmkindik jasaǵan jón.
3. Qazaqstan Prezidenti Joldaýynda zeinetaqy jinaǵynyń jetkilikti mólsheriniń sheginen asatyn bóligin turǵyn úi satyp alý maqsatynda «Otbasy bankine» aýdarýǵa ruqsat berý qajet dep atap kórsetti. Kópbalaly otbasylar úshin de bank tarapynan yntalandyrý jáne qoldaý mehanizmin jetildirý;
4. Menshik túrine qaramastan barlyq mekemelerde, uiymdar men ujymdarda «Mereili otbasy» baiqaýy ótkizilýi tiis. Áleýmettik jeliler men buqaralyq aqparat quraldarynda otbasy qundylyqtaryn zamanaýi formatta dáripteitin aqparatty, video-kontentti kóbeitý.
