video kadry
Densaýlyq saqtaý ministri Ajar Ǵiniiat ministrlik bala saýdasy máselesin qalai sheshetinin aitty, - dep habarlaidy Tengrinews.kz saity.
Senat otyrysynda jýrnalister ministrden Densaýlyq saqtaý ministrligi bala saýdasy máselesin sheshýge nege shara qoldanbai jatqanyn surady.
"Mundai jaǵdailar bizde, shamamen, bes jyl buryn bolǵan. Keiin barlyq perinataldyq ortalyq pen perzenthanaǵa beinebaqylaý ornattyq, baladan bas tartqan analarmen jumys isteitin psihologtardy qabyldadyq. Osyndai maqsatty jumystar júrgizdik. Egjei-tegjeiin bilmeimin, BAQ málimetinshe, áiel ózi týǵan balasymen birge shyǵarylǵan, al bul jaǵdaidyń barlyǵy jaldamaly páterde bolǵan", - dep jaýap berdi ministr.
Ǵiniiattyń aitýynsha, barlyq perzenthanada beinebaqylaý ornatylǵan. Sonymen qatar, basshylar perzenthanada ne bolyp jatqanyn baqylaidy.
"Eger bosaný jaqsy ótse, olardy uzaq ustamaidy, standart boiynsha úsh-tórt kún. Mundai oqiǵa bolǵan eken, eldiń túkpir-túkpirindegi barlyq meditsina qyzmetkerlerimen qaitadan jumys júrgizemiz", - dep túiindedi ol.
Eske salaiyq, 12 qańtarda Jambyl oblysy Politsiia departamentiniń qyzmetkerleri Taraz qalasy prokýratýrasymen birlesip júrgizgen arnaiy is-shara barysynda jańa týǵan balany satý deregin anyqtaǵan.
