Qazaqstan Respýblikasynyń Premer-Ministri Álihan Smaiylov Ázerbaijan Respýblikasynyń Premer-Ministri Ali Idaiat ogly Asadovpen telefon arqyly sóilesti, dep habarlaidy primeminister.kz.
Ázerbaijan Respýblikasynyń Premer-Ministri A. Asadov Á. Smaiylovty Qazaqstan Respýblikasynyń Premer-Ministri laýazymyna taǵaiyndalýymen quttyqtady. A. Asadov destrýktivti kúshterdiń agressiiasy saldarynan qaza tapqandardyń otbasylaryna qaiǵyryp kóńil aitty, sondai-aq elimiz úshin osy qiyn sátte Qazaqstan halqyna degen qoldaýyn bildirdi.
«Ázerbaijan – Qazaqstannyń senimdi strategiialyq seriktesi. Bizdiń elderimiz arasynda syndarly saiasi dialog jáne ekijaqty qarym-qatynastardyń keń salasy boiynsha jemisti ózara is-qimyl jolǵa qoiylǵan. Biz ózara tiimdi saýda-ekonomikalyq bailanystardy keńeitýge jáne tereńdetýge niettimiz», – dedi Á. Smaiylov. AR Premer-Ministri A. Asadov QR Premer-Ministri A. Smaiylovty ózine qolaily ýaqytta Ázerbaijanǵa kelýge shaqyrdy.
Ázerbaijan – Qazaqstannyń mańyzdy saýda-ekonomikalyq seriktesi. 2021 jyldyń 10 aiynyń qorytyndysy boiynsha ózara saýda kólemi $261 mln qurady, bul 2020 jyldyń sáikes kezeńindegi kórsetkishten úsh ese kóp jáne 2019 jylǵy pandemiiaǵa deiingi deńgeiden edáýir artyq.
Biyl Qazaqstan men Ázerbaijan arasyndaǵy diplomatiialyq qarym-qatynastyń ornaǵanyna 30 jyl tolady.
