Qalyń qar Ázerbaijan turǵyndarynyń qozǵalysyn qiyndatyp jiberdi, dep habarlaidy "Ult aqparat".
Bakýdyń keibir joldarynda qalyń qar men aiazǵa bailanysty kólik quraldarynyń qozǵalysy qiyndady.
Qalanyń negizgi joldarynda uzyn-sonar keptelister paida bolsa, temirjol bailanystary aitarlyqtai keshigip jatyr. Mektepter men mektepke deiingi mekemelerde sabaqtar toqtatyldy. Sondai-aq qatty kóktaiǵaqtyń saldarynan kóptegen apat oryn aldy.
Qazirgi ýaqytta kóktaiǵaq saldarynan túrli jaraqat alǵan 12 adam Bakýdyń jedel járdemimen aýrýhanaǵa jetkizildi.
Aýa raiynyń qolaisyzdyǵyna bailanysty Baký politsiiasy joldardaǵy jazataiym oqiǵalardy boldyrmas úshin júrgizýshilerdi jeke avtokólikten ýaqytsha bas tartýǵa shaqyrdy. Sonymen qatar Baký qalasynyń biligi qalyń qardyń saldaryn joiý boiynsha qabyldanyp jatqan sharalar týraly habarlady.
«Bakýde 12 saǵat boiy toqtamai qar jaýýda. Jaýǵan qardyń deńgeii – 18 mm. Bul ailyq normanyń 90%-yn quraidy. Qalanyń kommýnaldyq qurylymdary túnnen bastap joldardy qardan tazartýǵa kiristi. Tehnikanyń kómegimen joldarǵa tuz jáne arnaiy himiialyq zattar sebiledi. Bul jumys keste boiynsha kúni boiy jalǵasady», – dedi Baký qalasynyń atqarýshy bilik vedomstvosynda.
Ázerbaijan ekologiia jáne tabiǵi resýrstar ministrliginiń Ulttyq gidrometeorologiialyq ortalyǵynyń direktory Ýmaira Tagievanyń aitýynsha, qazirgi ýaqytta Bakýde 5 gradýs aiaz, eldiń taýly aimaqtarynda 15 gradýs aiaz tirkelgen, qardyń kóp bóligi Ázerbaijannyń soltústik aimaǵynda túsken.
«Qazir bul protsestiń shyńy baiqalady, al keshke qarai qardyń qarqyndylyǵy tómendeidi. Eger ótken túnde aýa temperatýrasy 4,8 gradýs aiaz bolsa, osy túnde 8-9 gradýs aiaz bolady», – dep atap ótti Ý.Tagieva.
Gidrometeorologiialyq qyzmettiń basshysy 2012 jyldyń qysynda temperatýra 11 gradýs aiazǵa deiin tómendep, 1969 jylǵy rekordty jańartqanyn eske saldy. 2012 jyly 14 kún sýyq bolyp, aýa temperatýrasy 0 gradýsty kórsetken.
Sonymen birge, Ázerbaijannyń ulttyq gidrometeorologiia qyzmeti 25 aqpanda tańerteń Baký men Absheron túbeginde qar birtindep saiabyrsidy dep habarlady. Kúndiz Ońtústik jelge aýysatyn soltústik-batystan jel soǵady. Eldiń aimaqtarynda qar saiabyrsidy, kúndiz ashyq bolady. Túnde jáne tańerteń joldarda kóktaiǵaq kútilýde.
Avtory: Serikbol Qoshmaǵanbetov
