Ázerbaijan qorǵanys ministrligi Armeniiany iri elektr stantsiiasy shoǵyrlanǵan Mingechevir (Mingechaýr) qalasyn zymyranmen atqylady dep aiyptady. Ázerbaijan prezidentiniń kómekshisi Hikmet Gadjiev Ázerbaijan astanasy Baký mańyndaǵy Hyzy jáne Apsheron aýdanynyń da atqylaýǵa ushyraǵanyn habarlady. Atalǵan eldi mekenderdiń barlyǵy Taýly Qarabaqtan jyraq ornalasqan.
Ázerbaijan bas prokýratýrasynyń habarlaýynsha, armian taraby Mingechevir qalasyn úsh zymyranmen atqylaǵan, sonyń kesirinen bes turǵyn zardap shekken.
Armeniia qorǵanys ministrligi jáne ózin respýblika dep jariialaǵan Taýly Qarabaq biligi Bakýdiń atys jaily málimdemesin joqqa shyǵaryp, ony "arandatyp otyr" dep aiyptady.
Jeksenbi kúni tańerteń Taýly Qarabaqtan alysta ornalasqan Ázerbaijannyń Giandja qalasy da shabýylǵa ushyraǵan. Taýly Qarabaqtaǵy armian kúshteri buǵan deiin ázerbaijan áskeriniń Stepanakert pen ózge eldi mekenderge shabýyl jasaǵanyn málimdep, muny "qarymta shabýyl" dep atady. Ázerbaijan biliginiń málimdeýinshe, Giandja qalasyn atqylaý kezinde bir adam qaza tapqan.
Ázerbaijan prezidenti Ilham Áliev jeksenbi kúni keshke halyqqa jasaǵan joldaýynda eger Armeniia Taýly Qarabaqty Ázerbaijan aýmaǵy dep tanysa jáne áskerin qashan shyǵaratynyn habarlasa, Taýly Qarabaqta atysty toqtatynyn málimdedi. Ol sonymen birge 1990 jyldan beri armiandar baqylaýynda bolǵan Jebrail men ózge de birqatar eldi mekenderdiń ázerbaijan jaǵyna ótkenin aitty. Alaida Armeniia Jebrailden aiyrylǵanyn joqqa shyǵardy.
Taýly Qarabaq pen oǵan japsarlas jatqan aýdanda jaǵdai 27 qyrkúiekte kúrt ýshyqqan. Ázerbaijan men armian taraby bir-birin "atysty birinshi bastady" dep kinálady. Buǵan deiin BUU, Resei, Frantsiia, AQSh jáne ózge elder eki tarapty kelissóz ótkizýge shaqyrǵan.
