QR Indýstriia jáne infraqurylymdyq damý ministrligi Azamattyq aviatsiia komiteti tóraǵasynyń orynbasary qyzmetine Saltanat Tompieva taǵaiyndaldy, dep habarlaidy "Ult aqparat".
«QR IIDM Jaýapty hatshysynyń 2019 jylǵy 23 jeltoqsandaǵy buiryǵymen QR Indýstriia jáne infraqurylymdyq damý ministriniń, QR Úkimetiniń jáne QR Prezidenti Ákimshiliginiń kelisimimen Azamattyq aviatsiia komiteti tóraǵasynyń orynbasary laýazymyna Tompieva Saltanat Erkinqyzy taǵaiyndaldy», - delingen komitettiń Facebook-taǵy paraqshasynda jariialanǵan aqparatta.
Saltanat Tompievanyń Azamattyq aviatsiia komitetinde eńbek ótili 20 jyldan asady. Ol azamattyq aviatsiia salasyndaǵy qyzmetin Azamattyq aviatsiia komiteti aviatsiialyq qaýipsizdik sektorynyń jetekshi mamany bolyp bastady. 1999-2008 jyldar aralyǵynda Strategiialyq josparlaý, áýe qyzmetteri naryǵyn qalyptastyrý bólimderiniń, Áýejailar qyzmetin retteý basqarmasynyń, ákimshilik-quqyqtyq jumys jáne halyqaralyq qatynastar bóliminiń bas mamany qyzmetterin atqardy. 2008 jyldan 2012 jylǵa deiin - Áýe keńistigin paidalaný, Halyqaralyq standarttardy engizý, Halyqaralyq qatynastar basqarmalarynyń bas sarapshysy.
2012 jyldan bastap qazirgi ýaqytqa deiin Halyqaralyq qatynastar jáne áýe tasymaldary basqarmasynyń basshysy, Halyqaralyq qatynastar jáne áýe tasymaldary basqarmasynyń bas memlekettik aviatsiia inspektory – basqarma basshysy laýazymdaryn atqardy.
Memlekettik qyzmettegi eńbek jetistikteri úshin «Qazaqstan Táýelsizdigine 20 jyl», «Qazaqstan Táýelsizdigine 25 jyl» mereitoilyq medaldarymen, «Qurmetti aviator» vedomstvolyq tós belgisimen, «Eren eńbegi úshin» Qazaqstan Respýblikasynyń memlekettik nagradasymen marapattalǵan.
