Azamattardyń soltústik óńirlerge kóshýine járdemdesý máseleleri Úkimettiń turaqty baqylaýynda. Bul jaiynda Májilis depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy QazAqparat.
«Soltústik óńirlerdegi demografiialyq ahýaldyń ózektiligin eskere otyryp, Úkimet ońtústikten soltústik óńirlerge azamattardyń qonys aýdarýyn yntalandyrý boiynsha júieli is-sharalar qabyldaýda. Qonys aýdarýdy yntalandyrýǵa baǵyttalǵan is-sharalar Nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy aiasynda júzege asyrylýda. Sonymen qatar, qonys aýdarýshylar úshin memlekettik qoldaý is-sharalaryn kúsheite otyryp, baǵdarlama Ulttyq jobaǵa (dárejesi - red) ózgertiledi», - delingen jaýapta.
Úkimet basshysynyń atap ótýinshe, Ulttyq jobada qonys aýdarýshylardy qoldaý boiynsha turǵyn úidi jaldaýǵa (jalǵa alýǵa) sýbsidiialar tóleý túrinde quraldar saqtalady. Qonys aýdarýshylardy óz betinshe qabyldaityn jáne jumysqa ornalastyratyn jumys berýshilerdi qoldaý boiynsha is-sharalar kúsheitiledi.
«Baǵdarlama iske asyryla bastaǵannan beri 27 myńnan asa adam jumys kúshi tapshy óńirlerge kóshti. Atalǵan tetikti ózektendirý maqsatynda Memleket basshysynyń tapsyrmasy boiynsha kóshýge sýbsidiialar mólsheri otbasynyń árbir múshesine 35 AEK-ten 70 AEK-ke deiin arttyryldy», - delingen Premer-Ministr jaýabynda.
Keltirilgen aqparatqa qaraǵanda, aqpan aiynda Elektrondyq eńbek birjasy bazasynda qonys aýdarýshylarǵa arnalǵan biryńǵai aqparattyq resýrs quryldy. Aqparattyq resýrs erikti túrde qonys aýdarýdy uiymdastyrýdy reglamentteitin normativtik quqyqtyq aktiler, qabyldaý óńirlerinde bos jumys oryndarynyń bolýy, turǵyn úidiń bolýy jáne onyń baǵasy, qonys aýdarýǵa kvotanyń bolýy, óńirdiń/aýdannyń, aýyldyń pasporty, sondai-aq qonys aýdarýdy uiymdastyrý jónindegi oń mysaldar týraly aqparatty qamtidy.
«Qonys aýdarýshylardyń turǵyn úi máselelerin sheshý úshin Soltústik Qazaqstan oblysynda turǵyn úi satyp alý tetigi iske asyrylýda. Osylaisha, búgingi kúni 1 myńnan astam turǵyn úi satyp alyndy. Tańdaýdy keńeitý maqsatynda qonys aýdarýshylardyń kelý aimaqtary Aqmola jáne Qaraǵandy oblystarymen tolyqtyryldy. Budan bólek kóship kelýshilerde baǵdarlama aiasynda granttar, mikrokredit alyp, mal, ósimdik sharýashylyǵymen ainalysýǵa múmkindik bar. Jeńildetilgen kreditter qonys aýdarýshylardyń qarjylyq jaǵdaiyn jaqsarta otyryp, olardyń sapaly básekege qabiletti ónim óndirýin jáne sharýashylyqtarynyń odan ári damýyn yntalandyrady», - delingen jaýapta.
Asqar Mamin jumys kúshi jetispeitin aimaqtardaǵy mektep túlekterin daiarlaý úshin jumys kúshi jetispeitin aimaqtardyń bilim berý mekemelerinde «Serpin» jobasy júzege asyrylyp jatqandyǵyn atap ótedi. 2014 jyldan beri 25 myńǵa jýyq jas «Serpin» jobasyna qatysqan.
«Óńirler halqynyń demografiialyq tepe-teńdigin keshendi sheshý jańa Kóshi-qon saiasatynyń 2022-2026 jyldarǵa arnalǵan tujyrymdamasy aiasynda ishki kóshi-qonnyń damýyna yqpaldasýdy jáne memlekettik qoldaý sharalaryn kúsheitý máselelerin (jumys kúshi tapshy óńirlerge qonys aýdarý úshin yntalandyrý, turaqty jumyspen qamtý jáne turǵyn úimen qamtamasyz etý, jumys kúshi tapshy óńirlerge qonys aýdarǵan adamdardy ustap qalý) sheshýdi kózdeidi. Azamattardyń soltústik óńirlerge kóshýine járdemdesý máseleleri Qazaqstan Respýblikasy Úkimetiniń turaqty baqylaýynda», - delingen jaýapta.
