Búgin Qostanaida bilim berý salasyndaǵy mańyzdy saltanatty is-shara ótti. Muǵalimderdiń kásibi merekesi qarsańynda «Úzdik pedagog – 2021» respýblikalyq baiqaýynyń qorytyndysy shyǵaryldy. Bul týraly QR Bilim jáne ǵylym ministri Ashat Aimaǵambetov Facebook-te jazdy, dep habarlaidy "Ult aqparat".
«Biyl onynshy ret ótip jatqan mereitoilyq rásim Qazaqstan Táýelsizdiginiń 30 jyldyǵy qarsańynda uiymdastyrylyp, asa kórnekti aǵartýshy, pedagog Ybyrai Altynsarinniń 180 jyldyǵymen tuspa-tus keldi. Osyǵan bailanysty biz is-sharany uly aǵartýshynyń týǵan jerinde ótkizemiz dep sheshim qabyldadyq.
2020 jyldyń qańtarynda Memleket basshysy Qasym-Jomart Kemeluly Toqaev «Pedagog mártebesi týraly» Zańǵa qol qoidy. Prezidenttiń qoldaýynyń arqasynda jáne osy Zańnyń qabyldanýynyń nátijesinde biz muǵalimderdiń jalaqysyn arttyryp, pedagogterdi ózine tán emes fýnktsiialardan bosatý boiynsha jumys júrgizdik.
Búgin elimizdiń túkpir-túkpirinen kelgen 64 muǵalim «Úzdik pedagog-2021» ataǵyna ie boldy. Pedagogterdiń árqaisysy 1000 AEK kóleminde sertifikatpen jáne «Úzdik pedagog» tósbelgisimen marapattaldy. Sonymen qatar aqshalai syiaqylar jergilikti atqarýshy organdar tarapynan da bekitildi. Bul kúni 10 pedagog «Eńbek ardageri» medalimen jáne «Y. Altynsarin», «Bilim berý isiniń qurmetti qyzmetkeri» tósbelgilerimen marapattaldy. Pedagogika salasynyń eńbek ardagerlerine de qurmet kórsetildi.
Barlyq jeńimpazdy laiyqty marapattarymen quttyqtaimyn! Qajyrly eńbekterińiz ben mamandyqqa degen adaldyqtaryńyz úshin alǵys aitamyn», - dep atap ótti Aimaǵambetov óz jazbasynda.
