Bilim jáne ǵylym ministri Ashat Aimaǵambetov qazaqstandyqtardy jańa oqý jylynyń bastalýymen quttyqtady, dep habarlaidy "Ult aqparat".
«Sizderdi 1 qyrkúiek — jańa oqý jylynyń bastalýymen quttyqtaimyn! Bilim berý uiymdarynda oqý jyly qatań sanitarlyq talaptardy saqtai otyryp, dástúrli formatta bastalady.
Balalar óz mektepterin, dostary men synyptastaryn, al muǵalimderimiz oqýshylaryn saǵyndy. Barlyǵy mektepterdiń ashylýyn asyǵa kútti.
Álemdik pandemiia bilim berý úrdisindegi muǵalimniń baǵa jetpes rólin aiqyndai tústi. Atap aitsaq, muǵalimniń kásibiligi, tájiribesi, balaǵa degen súiispenshiligi men oqýshynyń ómirindegi atqaratyn róli aiqyndaldy. Álbette, muǵalimder gadjet ekrandary arqyly emes, balalarmen tikelei bailanysta bola otyryp beretin bilimdi zamanaýi tehnologiialarmen salystyrý qiyn», - dep jazdy ministr jelidegi paraqshasynda.
Ministr 1 qyrkúiek — birinshi synyp oqýshylary úshin erekshe mereke ekendigin atap ótti.
«Biyl 394 myńǵa jýyq bala mektep tabaldyryǵyn alǵash ret attaidy. Osy saltanatty kúni «Álippe» men «Býkvar» oqýlyqtaryn qoldaryna alatyn birinshi synyp oqýshylaryn quttyqtaǵym keledi. Búldirshinderimizge myqty densaýlyq tilep, ashyq jáne bilimqumar bolýǵa shaqyramyn.
Jańa oqý jyly árbir oqýshy, stýdent, muǵalim jáne oqytýshy, jalpy bilim berý salasyna qatysy bar árbir adam úshin qyzyqty ári paidaly bolýyn tileimin.
Qurmetti áriptester! Kópten kútken dástúrli formatqa oralyp, mektep qabyrǵasynda balalardyń jarqyn kúlkilerin estý sizderdi qýanyshqa bóleitinin bilemin. Joǵary oqý oryndaryndaǵy aýditoriialar da qyzyqty áńgimeler men ziiatkerlik pikirtalastarǵa toly bolary sózsiz», - dep túiindedi Aimaǵambetov.
