Bilim jáne ǵylym ministri Ashat Aimaǵambetov Facebook-tegi paraqshasynda mektep direktoryn taǵaiyndaýdyń jańa tártibine toqtaldy, dep habarlaidy "Ult aqparat".
«Aldyńǵy jazbamdy jalǵastyra otyryp, mektep direktorlaryn taǵaiyndaýdyń jańa tártibine toqtalyp ótsem.
Shyn máninde, bul — mektep direktorlary, oqý meńgerýshileri, pedagogter jáne sarapshylarmen birlese bir jyldan astam ýaqyt atqarǵan tynymsyz jumystyń nátijesi.
Birinshiden, endi mektep direktorynyń mindetin atqarýshysy bolyp úsh aidan aspaityn jáne bir retten artyq emes merzimde ǵana isteýge bolady. Osy kezeńde konkýrs ótkizilip, jańa basshy taǵaiyndalýy kerek», dep jazdy Ashat Aimaǵambetov.
Onyń aitýynsha, erejede belgilengendei, mektep direktorynyń bos nemese ýaqytsha bos laýazymyna konkýrs týraly habarlandyrý bos oryn paida bolǵannan keiin 7 jumys kúni ishinde bilim basqarmasynyń resmi saitynda jáne akkaýntynda ornalastyrylýy kerek.
«Osylaisha, bos nemese ýaqytsha bos direktor laýazymyna konkýrs jariialamai aq, jyldar boiy direktordyń mindetin atqarýshysy bolyp jumys istep júre berýge endi jol berilmeidi.
Aitpaqshy, búgingi tańda elimizde mektep basshysy laýazymyna 700-den astam bos jumys orny bar jáne sáikesinshe ol jerlerde direktordyń mindetin atqarýshy adamdar jumys istep júr», - dedi ministr.
Onyń aitýynsha, ekinshiden, erejede direktordyń ýaqytsha bos laýazymyna (bala kútimine bailanysty demalys, oqý jáne t.b.) taǵaiyndaý reglamentteledi. Mundai jaǵdailarda da uiym basshysy tikelei taǵaiyndaý emes, konkýrs arqyly anyqtalady.
Úshinshiden, endi direktor laýazymyna konkýrsty aýdandyq bilim bólimderi emes, oblystyq bilim basqarmalary ótkizetin bolady. Iaǵni, konkýrstyq rásimderdi uiymdastyrady jáne direktorlardy anyqtaidy. Sodan keiin direktordyń kandidatýrasy boiynsha qujattar eńbek shartyn jasasý úshin bilim bólimine jiberiledi. 5 jylǵa taǵaiyndalady.
«Baiqaýdyń ózi birneshe kezeńnen turady:
- kandidattardyń direktor laýazymyna qujattardy tapsyrýy;
- bilim basqarmasyndaǵy kadr qyzmetiniń kandidattyń biliktilik talaptaryna sáikestigin baǵalaýy, konkýrsqa qatysýǵa ruqsat berýi;
- úmitkerlerge arnalǵan elektrondyq testileý (basqarýshylyq quzyretter, pedagogika, psihologiia, QR Zańnamasy boiynsha testileý);
- oqý ornynyń Qamqorshylyq keńesiniń aldynda mekteptiń damý josparyn qorǵaý (testileýdi sátti tapsyrǵan jaǵdaida);
- Bilim basqarmasyndaǵy áńgimelesý (Qamqorshylyq keńesiniń aldynda mekteptiń damý josparyn sátti qorǵap shyqqan úmitkerler jiberiledi)», dep jazdy Ashat Aimaǵambetov.
Qamqorshylyq keńesteriniń quramyna ata-analar, pedagogika salasynyń eńbek ardagerleri, qoǵam qairatkerleri, Úkimettik emes uiymdardyń ókilderi kiredi.
Barlyq kezeńnen ótken úmitkermen bilim bólimi tiisti eńbek shartyn jasap, ony direktor etip taǵaiyndaý týraly buiryq shyǵarady.
«Kandidattardy Qamqorshylyq keńesimen kelisý boiynsha kóptegen pikirtalas boldy.
Biz muny da eskerdik. Endi Qamqorshylyq keńesi direktor laýazymyna keminde eki kandidat boiynsha kelisim berýi tiis. Eger kandidattardyń sany budan az bolsa, onda konkýrs ótkizilmegen bolyp esepteledi jáne qaita jariialanady.
Eger Qamqorshylyq keńesi eki márte eki kandidattan az adam tańdaǵan jaǵdaida jáne sáikesinshe konkýrs eki ret ótkizilmegen bolsa, onda konkýrsqa qatysyp jatqan barlyq kandidat kelesi kezeńge ótedi. Qamqorshylyq keńestiń jumysy men qurý erejesin de qaita qaraýdamyz», - dedi ol.
Onyń aitýynsha, qaǵidada bolashaq direktorlarǵa qoiylatyn biliktilik talaptaryna kóp kóńil bólinedi. Munda birneshe erekshelik bar.
Birinshiden, bolashaq direktorlar mindetti túrde menedjment kýrstarynan ótip, tiisti sertifikattary bolýy kerek.
Ekinshiden, direktor laýazymyna basshy retinde jumys ótili bar kásibi muǵalimder taǵaiyndalýy múmkin, al jalpy pedagogikalyq jumys ótili keminde 5 jyl bolýy qajet.
Úshinshiden, úmitker taǵaiyndalǵanǵa deiin sońǵy eki jyl bilim berý salasynda jumys isteýi tiis.
Bul tarmaq buryn-sońdy qajetti jumys tájiribesi men pedagogikalyq eńbek ótili bar, biraq sońǵy jyldary bilim berý salasynda jumys istemegen adamdar mektep direktory laýazymyna taǵaiyndalǵan tájiribeniń bolýyna bailanysty engizilip otyr. 20 jyl buryn muǵalim bolyp jumys istegen nemese tipti mektep direktory bolǵan, degenmen bilim berý salasyndaǵy jańashyldyqtar men oryn alǵan ózgerister týraly habary joq, aýyl ákimdikteriniń nemese ózge de memlekettik organdardyń qyzmetkerleri mektep direktory bolyp taǵaiyndalatyn.
Tórtinshiden, taǵy bir jańashyldyq — kadr rezervin qurý. Alǵashqy eki kezeńnen (testileý jáne qamqorshylyq keńespen kelisý) sátti ótken, biraq bilim basqarmasynda áńgimelesýden ótpegen kandidattar endi bir jylǵa rezervke alynýy múmkin. Bul kandidattarǵa mekteptiń Qamqorshylyq keńesimen kelise otyryp, bir jyl ishinde direktor laýazymyna taǵaiyndalý quqyǵyn beredi.
Besinshiden, biyldan bastap direktorlardy rotatsiialaý institýty engiziledi.
«Sońǵy birneshe aida biz erejelerdi ázirlep, sarapshylarmen talqylap jatyrmyz. Direktorlardy taǵaiyndaý rásimderi men olardy materialdyq qoldaý jónindegi osy ózgeristiń barlyǵy direktor laýazymyna laiyqty, barynsha daiarlanǵan kandidattardy tańdaýǵa jáne bilim berý uiymdary basshylarynyń básekege qabilettiligin arttyrýǵa baǵyttalǵan.
Saiyp kelgende bul bilim berý sapasyna áser etedi», - dedi Ashat Aimaǵambetov.
