Kelesi oqý jylynda birinshi synyp oqýshylary «Saýat ashý» pániniń ornyna «Álippe» men «Ana tilin» oqidy. QR Bilim jáne ǵylym ministri Ashat Aimaǵambetov Facebook-tegi paraqshasynda osylai jazdy, dep habarlaidy "Ult aqparat".
«Álippe boiynsha. Jaqynda Memlekettik jalpyǵa mindetti standartqa ózgerister engizilip, Ádilet ministrliginde tirkeýden ótti.
Ondaǵy mańyzdy jańalyqtardyń biri – kelesi oqý jylynda birinshi synyp oqýshylary «Saýat ashý» pániniń ornyna «Álippe» men «Ana tilin» oqityn bolady. Birinshi synyp oqýshylary oqý jylynyń bastapqy eki toqsanynda «Álippeniń» baǵdarlamasyn oqysa, qalǵan eki toqsanda «Ana tili» pánin oqidy. Sáikesinshe, orys tilinde nemese basqa tilderde bilim alatyn synyptarda «Býkvar» men «Obýchenie gramote» pánderi júrgiziledi», - dedi Ashat Aimaǵambetov.
Onyń aitýynsha, «Álippe» Ahmet Baitursynulynyń ádistemesi negizinde daiyndalady.
Ministr qazir oqýlyqtardy ázirleý boiynsha úlken jumys júrgizilip jatqanyn atap ótti.
«Biryńǵai baǵdarlama jasaýmen ainalysatyn jumys tobyn qurdyq.
Onyń quramynda myqty til mamandary, ádiskerler, bastaýysh synyp muǵalimderi men buǵan deiin oqytylǵan «Álippe» oqýlyqtarynyń avtorlary bar. Orynbasarym Sholpan Karinova osy jumys tobynyń alǵashqy otyrysyn ótkizip te úlgerdi.
Baǵdarlamalar men oqýlyqtar daiyn bolǵannan keiin olardy pilottyq mektepterde synaqtan ótkizemiz dep josparlap otyrmyz. Keiin basqa mektepterge jiberiletin bolady. Bul másele meniń jiti baqylaýymda», - dedi Ashat Aimaǵambetov.
