2025 jylǵa deiin Qazaqstanda bilim men ǵylymdy damytýdyń jańa memlekettik baǵdarlamasy ázirlendi. Atalǵan qujatty búgin Úkimet otyrysynda QR Bilim jáne ǵylym ministri Ashat Aimaǵambetov tanystyrdy, dep habarlaidy QazAqparat.
«Búgingi tańda bilim jáne ǵylym júiesiniń aldynda jańa maqsat-mindetter tur. Olardy sheshý úshin Memleket basshysynyń tapsyrmasy negizinde 2020-2025 jyldarǵa arnalǵan jańa baǵdarlama jobasy ázirlendi. Jańa baǵdarlamada birneshe strategiialyq qujat negizge alyndy. Atap aitqanda, Elbasynyń »100 naqty qadam« ult jospary jáne »Rýhani jańǵyrý« baǵdarlamalary, Memleket basshysynyń sailaýaldy tuǵyrnamasy, Tamyz keńesinde, Joldaýda bergen bilim salasyna qatysty tapsyrmalary tolyǵymen qamtyldy», - dedi 2025 jylǵa deiin Qazaqstanda bilim men ǵylymdy damytýdyń memlekettik baǵdarlamasyn tanystyrǵan ministr.
Onyń atap ótýinshe, baǵdarlama jobasy pedagogikalyq ujymdarda qarapaiym muǵalimdermen, sarapshylardyń qatysýmen jáne Parlament depýtattarymen aldyn ala talqylandy. Sonymen qatar QR Premer-Ministrdiń orynbasary Berdibek Saparbaevtyń óńirlerge sapary aiasynda da jergilikti jerlerdegi muǵalimdermen jan-jaqty qarastyryldy.
«Osy jobanyń taǵy bir ereksheligi, biyl biz PIRLS, PISA, ICILS siiaqty 5 halyqarlyq zerteýdiń nátijesin aldyq. Osy zertteýlerdi qarap, onyń taldaýlaryna kóz júgirttik. Tiisti sheshimder qabyldadyq. Eń basty máselelerdi jáne olardy sheshý joldaryn eskerdik. Osylaisha ǵylymi negizde daiyndaldy dep aitýǵa bolady. Jalpy memlekettik baǵdarlama jobasynda 2 maqsat, 11 mindet, 8 indikator jáne 39 kórsetkish kózdelgen. Basty maqsattary kelesidei: otandyq ǵylym men bilimniń álemdik básekege qablettiligin arttyrý, qundylyqtar negizinde tulǵalardy tárbieleý men oqytý, sonymen qatar ekonomikamyzdaǵy ǵylymnyń úlesin ulǵaitý. Bul maqsatqa jetý 5 baǵyt pen 11 mindet aiasynda júzege asady», - dedi Ashat Aimaǵambetov.
